Khawtlang hruaitu ṭha ni se
Mizoram district paruka local council 82 leh village council 492 inthlanna buatsaih chu harsatna lian tham thleng loin tluang taka kalpui a ni a; kum nga chhunga khawtlang hruaitu thar tur thlan chhuah an ni.
Khawtlang hruaitu neih ṭhat leh ṭhat loh hi khawtlang hmasawnna turin a pawimawh hle mai a, Mizoram sorkar kalphungah village council leh local council-in thuneihna nei sang vakin lang lo mah se, a chhawr thiam leh hmang thiam chuan an thuneihna hi ṭangkai takin an hmang ṭhin.
Tunah chuan khawtlang hruaitu thlan tharte hian kum nga chhung ro an rel dawn a, hruaitu thlang thiam deuhte chuan kum nga chhungin khawtlang nuam zawk an nei ang a, hruaitu nei fuh lo deuh erawh chu midangte phak loin an awm phah thei ang. VC leh LC thuneihna hi a sang lo tiin sawi ṭhin mah ila, VC leh LC fel deuhte chuan khawtlang tana ṭha turin hna an thawk a, hmasawnna tham thil an kalpui hman tawh ṭhin.
Kum nga a nih tawh dawn avangin VC leh LC thlan tharte pawhin tih takzeta khawtlang rawngbawlna rilru an put a pawimawh dawn a; inthlan dawnah political party behchhan an nei a nih pawhin thlan tlin an nih hnuah chuan khawtlang tana thawk tur an ni tih chiang se, khawtlang hruaitu ṭha tak ni rawh se.