Sorkar dodal leh ngaihdan puanna

Chief minister Lal Thanhawla chuan, "Hmasawnna tura kan kalnaah tih fuh tam tak kan nei a, tih fuh lo palh pawh a awm thei a, engamah hmaa sorkar hmalakna dodal ngawt hi kohhran leh NGO-te tih tur a ni em tih ngaihtuah a ṭul. Roreltute hi an dik loh chuan sawisel thiang an ni a, mahse, kohhran chuan kohhran tih âwm takin, NGO pawhin NGO tih âwm takin an ti tur a ni," tiin a sawi.

Sorkar hi a siamtu mipui a nih miau avangin mipuiin an sawisel thiang a, hei hi sokar lam pawhin an pawm thiam tur a ni. Tunlai khawvel hi tun hmate nen kawng tam takah a inang tawh lo a, a inan lohna siamtu lian ber pakhat chu social media ṭha tawh leh TV leh chanchinbu pawn lam thlenga ngaihdan puanzarna tam ta hi a ni.

Tun hma deuhte chuan miin ngaihdan a neih pawhin puanzarna awm lo tluk a ni a, chanchinbu lama article-a ziah bak chu tih theih a vâng hle. Cable TV chhuah hnuah ngaihdan thawnna an siam a, hei hi chhiar chhuah ṭhin a ni. Tunah chuan mitinin mahniin ngaihdan puannna kan kawl ta deuh vek a, internet kaltlangin Facebook, Whatsapp leh thil dangte hmangin kan duh kan sawi thei a, chu chu kan mobile phone aṭangin awlsam taka tih theih a la ni zui.

Hengte avang hian eng thil mai pawh hi tun hma aiin kan uar ta zawk emaw tih mai tur a ni a, kan thil tih ṭhin ngai reng pawh ni se a puanzarna lam a tam/chak tawh avangin a hretu an darh zau ta zel a ni. Hei hi sorkar lam pawhin thiam taka an pawm mai a hun tawh a, mipuiin ngaihdan an neihte an puanchhuahna a tam tawh avangin mipui hi an phunchiar ta thutah ngai mai lo se; pawl leh kohhrante thil kalpui dante pawh hi tun hma nen a danglamna a tam lo a, a sawizuina hmanrua a ṭhat tawh zawk vang a nih hmel.

Hetihlai hian Chief Minister sawi ang hian thil 'enchhin' tih a nih hi chuan buana hmaa kherh ang deuha lo beih nghal vak mai hi chu a finthlak ber lo a, a ṭhatna lamte leh a ṭhat lohnate pawh a awm a nih chuan zir chian hi a ṭul ṭhin a, sorkar dodala bei nghal chiam loa dawhtheih kan zir tlan pawh a ṭha awm e.