Thutlukna siam tawha din ngam

Mizoram Commercial Vehicle Union (MCVU) chuan tuialhthei man pung tihhniam an phût avangin nimin October 23, 2024 khan Mizoram pumah nawrh an huaihawt a, sumdawnna lirthei eng emaw zat an ding.

MCVU hian a hmain tuialhthei man pung tawh chu tihniam leh deuh turin sorkar an lo ngen tawh a; mahse, sorkar chu thutlukna a lo siam tawhah ding tlangin, tuialhthei man tihniam a nih loh tur thu Chief Minister-in a puang a, MCVU pawhin nawrh an huaihawt ta a ni.

Sorkarin chhiah lâk a tihpun avanga tuialhthei man pung hi a thatna leh that lohna a awm thei ang. Ram leh mipui tan that zawkna thlentu a nih theih nan sorkarin hma a la zui tur a ni a; sorkar hotute'n an sawi tawh angin, tuialhthei man pung hi Mizoram kawngpuiin a that phah ngei tur a ni ang.

Tuialhthei man pung hi a that leh that loh chu thu dang ni se, sorkarin uluk taka an ngaihtuah hnua thutlukna an siam tawh an kaltlangpui ngam hi a tha. Tute emaw nawrna avanga sorkarin thutlukna a siam tawh a sût leh hnî hnê ang hi a tha lo; hetiang hi tun hmain a lo awm fo tawh a, sorkar nêktu leh nawrtu apiang an hlawhtling zel mai em maw ni chu tia ngaihtuah theih chángte pawh a awm. Chutiang ni tawh lo a, nawrna na tak karah tláwm mai loa a thutlukna siam tawha sorkar a ding tlang ngam hi tha a, a lawmawm.

MCVU-in nawrh an huaihawt hma ní khan Home Minister chuan lungawi lohna lantir tumtute chu nawrh huaihawt lo turin a ngen nawn a; nawrh an kaltlangpui a nih pawha mipuiin an tawrh lutuk loh nan sorkar ruahmanna siamte an puang nghal bawk.

Sumdawnna lirthei thenkhat an nawrh avanga mipui tawrhna tiziaawm tura sorkar hmalakna a lawmawm. Sorkar ruahmannate kha mipui mamawh phuhru khawp ni lo mah se, harsatna lian thleng lo tura hmalakna a nih avangin mi tam takin an hmang tangkai a ni.