Sorkar hotute leh eirûknaa fihlîm

Minister Dr Vanlalthlana chuan October 23, 2024 khan Sinlung Hills Council inthlan atana a campaign-naah tuna sorkar ding meka minister zingah eirûkna vanga hmingchhia an la awm loh thu leh eirûkah fihlim zel an tum thu a sawi.

Mizoram minister pakhatin sorkar ding meka minister-te zingah eirûkna laka hmingchhia an la awm loh thu leh eirûknaah fihlim zel an tum thu a sawi hi a dik turah ngai ila, a lawmawm. Chutihrualin, thla sawm emaw chauh hun an la hman avangin an hun hman tawh chin aṭanga teh erawh a dik famkim lo deuh mai thei.

Tun sorkar hian hun an la hmang rei lo a, hnathawhna hun an la neih tlem a; chu chu chhuanlama hmangin minister/MLA ṭhenkhat chuan hna an la thawh tam loh chungchangah inthiamna atan an hmang niin a lang. Chutiang bawkin eirûkna laka fihlim chungchangah pawh an hun hman tawh chin a la tlem a; an hun hman tawh chin aiin kum li chuang hun an la neih hian an dinhmun a hril zawk dawn a, eirûknaah an fihlim zel dawn em tih Mizoram mipuiin kan lo thlir reng dawn a ni.

Kan rama eirûkna leh hlemhlêtna hluar lutuk hi ram hmasawnna tiṭhanṭhutu, khawtlang nun thlenga tichhetu a ni a; tirem vek emaw, tihtlakhniam emaw theih a châkawm tak zet. Chutiang tur chuan mi tinin mawh kan phurh rualin, ram hotu lian zual - Chief Minister, minister leh MLA-te hian mawh an phur nasa lehzual àwm e.

Sorkar ding meka minister-te leh MLA-inte hi inthlan hmaa an intiam ang ngeiin eirûkna lakah kum nga chhungin fihlim tluan se tih hi Zoram mipui duhthusam a ni. Anmahni fihlim maiah duhtâwk loin, an hnuaia awm sorkar hnathawk zawng zawngte pawh eirûkna laka an fihlim ṭheuh theih nan ṭan lak a, theihtawp an chhuah tel mipuiin an beisei ngei ang.

Sorkar hnathawk ni lo, sorkara hna nei si zingah pawh hlemhle taka thil ti leh hna thawk an awm thei a; chutiang a awm loh nan chuan sorkar hotute hian uluk leh khauh takin vil zel bawk rawh se. Eirûkna leh hlemhlêtna tibo tura hma la tak tak turin mipuiin Mizoram sorkarah hian beiseina sang tak an nei a ni.