Inrenchem leh Mizote

Baptist Church of Mizoram hnuaia Social Concern depart­ment bultumin May, 2015 hi inrenchem leh sum khâwl inzirtirna thlaah an puang a, inrenchem turin kohhran mipuite an zirtir.

Inrenchem leh sum khawl inzirtir hi Mizote hian kan mamawh viau mai a, he mi kawngah hian hnam dangte kan la phak lo hle. Mizo zingah sum khawl pawimawhna hre lo, mahni thawh chhuah apiang hman zawh zel duh mai hi tam tham tak an la awm a, sorkar hnathawk leh sumdawng zingah pawh hetiang mi hi an awm. Hetihlai hian hnam dangte chuan an thawh chhuah a tlem emaw tam emaw khawl nachang an hria a, chu chu a ṭangkaizia pawh a takin an zir chhuak tawh a ni.

Mizorama hnam dang inhlawha lo kal, hna hniam tak tak thawkte hian an sum lakluh ang ang hi khawl nachang an hria a, Mizo nawlpuiin kan dawr tam loh post office lamahte leh bank-a sum khawl hi an nunphung pangngai ang maiin an kalpui. Mizo zingah chuan sum khawl sawi hian mi hausate tih tur bika ngaihna a lian a, mahni lakluh ang angah hian khawl chin siam hi kan thiam lo hle.

Hnam dang chuan thawh chhuah mila khawsak an thiam a, an sum lakluh milin an inchei a, chawhmeh an lei a, dawrah pawh kal phakna leh phak lohna neiah inngaiin inren takin an awm. Mizote erawh chu pawn lam lan danah chuan kan intluk tlang vek emaw tih mai tur a ni a, sum lalut tlem deuhte leh a hausa deuhte'n dawr thuhmunah thawmhnaw an lei a, pûk chawpa thawmhnaw leite hial kan awm a, a zialo hle a ni.

Mahni nihna angin lang ngam ila, kan sum lakluh a tlem deuh a nih chuan chumi mil chuan khawsak tum ila, kan lakluh a tlem a nih pawhin sum khawl theih chin hi a la awm thei tho a; a hmanna lam tihtlem a, inrenchem thiam a, sum khawl hi Mizote tan inzirna tur pawimawh tak a ni e.