Kohhran lungrualna leh inpumkhatna

Mizorama kohhran pawl hrang hrangte rawngbawlhona tur leh inpumkhat zelna atana hma latu tur Council of Churches in Mizoram (CCM) chu October 27, 2024 khan din a ni ta a; Mission Veng Kohhran biak-inah hawnna inkhawmpui neih a ni.

Mizoramah kohhran páwl eng emaw zat a awm a, chu'ng kohhrante chuan thurin leh kalphung an nei hrang hlawm. Thurin leh tih dan inang lote avangin kohhran mite zingah inhnialnate pawh a awm tawh ṭhin a, hei hi thil ṭha a ni lo. Kohhran ṭhenkhat chuan kohhran páwl dang mite nupui/pasal atana neihte an remti lo phei hi chuan ngaihtuah a tithui hle.

Kohhran páwl hrang hrangte inpumkhatna tur leh inlungrualna tura Mizorama kohhran lian pahnihte’n theihtawp chhuahin hma an la a, chu hmalakna chu tunah a lo hlawhtling ta a, kohhran pariat telna CCM din a lo ni ta hi a lawmawm.

Kohhran hrang hrangte telna Mizoram Kohhran Hruaitute Committee (MKHC) chu kum 1980 hnu deuh khan din a lo ni tawh a, tun thlengin a la awm. MKHC hian a remchan ang zelin hma a la ṭhin a; Kristianna leh kohhran chungchang mai bakah, ram leh hnam ṭhatna turin hma a lo la tawh ṭhin a, Mizoram buai karah remna leh muan a awm theihna tura hma a laknate phei chu a ropui hle.

MKHC leh CCM hi din a nih dan leh hma an laknaah an thil tum leh kalphungte a inang kher lo ang. CCM lo ding ta hian eng ang takin nge Mizorama kohhran pawl hrang hrangte inpumkhatna leh thawhhona turin awmzia a neih ang tih sawi mai a harsa rih a; beiseina sang tak erawh mipuiin an nei niin a lang.

Hnam khat, Kristian, Pathian ringtu ni vek si rawngbawlho leh nupui/pasala inneih tawn thlenga harsa khawpa kan awm hi tihreh theih a duhawm. Kohhrante rawngbawlho theihna tur leh inpumkhatna turin CCM hian theihtawp chhuah se.

Kohhrante inpumkhatna leh lungrualna tur hian CCM-a thawhhona ai mahin, mahni kohhran ṭheuha hmalak danin awmzia a nei zawk mah mai thei. Lang thei thil ṭhenkhatah CCM-ah ṭha taka thawhho ni mah se, mahni kohhran ṭheuha hmalak danin a zir loh a, kohhran dang ngaimawh tura hmalak zel a nih tho si chuan inlungrual a harsa hle ang. Kohhrante'n inlungrualna leh inpumkhatna tur zawngin mahni kohhran ṭheuhah hma an lak a ngai a ni.