Chawngheia thil nawr

RMSA hnuaia hnathawktu, tun hnaia sorkarin a chawlhtirte chuan tunlai hian an hna zawm leh phûtin chaw an nghei mek. Sorkar thuneitu lam chuan sorkar laipuiin pawisa a pek ṭhin a tihtawp tawh avangin Mizoram sorkarin a chhawr zui theih tawh loh thu an sawi ve thung.

RMSA hnathawktute hian an eizawnna ber a tawp takah chuan an manganzia sorkarah an thlen a, sorkar mi pawimawh hrang hrangte pawh an sawipui tawh. Hetih­lai hian sorkar lam chuan state suma ruai turin sum an nei lo tih an sawi chiang a, pawi ti hle mah se rawih chhunzawm ngaihna a awm tawh loh thu an hrilh.

Hnathawhna ber a tawp chuan a manganthlak hle ang tih a chiang a, eizawnna tihtawp tluka nâ hi a awm lo ang. Hei vang hian an theihna ang anga sorkar an nawr pawh hi an demawm hran lo a; nimahsela chaw ngheia sorkar an kar hian ngaihtuahna a ti kalthui hle. Contract-a hnathawkte an thawh hun a tawp hnua sorkar an kar zel dawn chuan sorkar tan a buaithlak takzet ang tih a chiang a, sorkar tan pawh do lêt harsa taka chaw ngheia sorkar an kar chinah phei hi chuan a buaithlak hle tawh ang.

Sorkar hian a dinna a tichiang thawkhat tawh niin a lang a, state sorkar suma rawih chhunzawm ngaihna a awm lo a nih hmel. Thil tih sak theih loh nawr an nih chuan chaw nghei mekte tan pawh kal zel ngaihna a vang hle ang a, chutih rualin thil tih theih a awm dawn a nih chuan heti teh hrepa innawr buai ngai lo hian sorkar pawh hian hma la rang rawh se.

Hriselna atana pawi thei leh nunna atana hlauh­awm khawpa mi an awm duh tawh chuan an mangang hle tih a chiang a, sorkar hian tih sak theih dan a nei a nih chuan a chêt ran a ngai a, a dinna a sawh sawn thei lo a nih pawhin chiang zawka inhrilh a ṭha hle awm e.