AR chhuahsan tur ram venhim

Aizawl khawpui lailia Assam Rifles battalion headquarters Zokhawsanga sawnna turah October 23, 2024 khan Mizoram sorkar aiawhte leh Assam Rifles hotu lúte'n inremna an ziak. Inremna hi April 1, 2025 aṭanga hman tura ruahman a ni.

Zokhawsanga AR insawnna turah inremna ziah a nih thu leh an hmun kalsan tur leh la luah zui turte Chief Minister chuan October 26, 2024 khan press mite hmaah a puang. Khatlaa AR 23 Sector Headquarters hmun leh AR Sector Commander (Deputy Inspector General) quarters-te chu AR-in an la luah zui ang a, a bak zawng chu an chhuahsan dawn niin a lang.

Aizawl laili aṭanga AR sawn chhuah chungchang hi political party ṭhenkhat chuan politics-a hamṭhatna lâkna atan hman an tum a, manifesto-ahte pawh an telh. Party ṭhenkhatin an thupui takah an nei lem lo a; ngaihsak miah lo party pawh an awm àwm e.

Mizoram CM-in kumin January thlaa Union Home Minister nen an inkawmnaah AR battalion hqrs chu Zokhawsangah an insawn ngei dawn thu a hrilh thu a lo sawi tawh. Chumi hnu thla sawmna velah insawnna tura inremna ziah a lo ni ta hi a lawmawm a, Mizo mipui tam tak an lawm ngei ang.

AR battalion hmun chhuahsan tur hman zui dan tur chungchanga sorkar hmasa lamin dan an lo siam tawh chu tihdanglam a nih tur thu Chief Minister-in press conference a neihnaah a sawi. Dan an tidanglam dawn a nih chuan uluk tak leh fimkhur taka an tih a ṭul ang.

AR chhuahdan tur ram hi mipui vantlang tan leh khawpui hmasawnna, changkanna leh mawina atan chauha hman leh, mimal leh pawlin ram/hmun an neih lohna tura humhalh hi mipui tam ber duh dan a nih ngei a rinawm a; chutiang tur chuan AR ram chhuahsanah mimal leh pawlin hmun an neih theih lohna turin dan ṭha tak siam mai bakah, khauh taka dan kenkawh a ṭul ang.

Páwlte pawhin an hamṭhatna atan leh an hmun atan hman tum lo se, an páwl chakna hmangin sorkar nawr lo se a ṭha hle ang. A pawimawh ber chu - AR hmun chhuahsan tur hmun ṭha tak leh khauh taka humhalh a ni a, sorkarin uluk tak leh fimkhur taka hma a lak chho a ngai dawn a ni.