Hnam dang CS nei leh ta ila

Mizoram chief secretary Dr Renu Sharma chu November 1, 2024 aṭangin Superanuation pension-in a châwl tawh dawn a; nimin October 29 khan Chief Minister leh Mizoram sorkara secretary-te'n an thlah a, October 28 khan Political & Cabinet, Vigilance leh Anti Corruption Bureau-a thawkte'n an thlah bawk.

Nimin tlai thleng kha chuan Mizoram chief secretary (CS) thar tur hriat a la ni lo. Mizoram sorkar hotute'n chief secretary atan Prime Minister leh Home Minister hnenah Vumlunmang Vualnam, IAS pe turin dil tawh mah se, an rawn dah ngei dawn em hriat a ni lo. Vumlunmang hi sorkar laipuia Aviation Secretary ni lai a ni a, ani lo hi chu Mizo (Zo hnahthlak) zingah chief secretary ni thei an awm rih loa sawi a ni.

Dr Renu Sharma hi Mizoram CS atan Ministry of Home Affairs-in October 28, 2021-ah a ruat a, November 2, 2021-ah Mizoram chief secretary atan lak luh a ni. Mizoram CS hna a thawh aṭanga rei vak lo, May 31, 2022 aṭangin NGO Coordination Committee chuan a pisa kai tur dan an tum a, mahse, CS hi Mizoram pawna a zin chhuah tâk avangin an dang mumal ta lo a, a rawn haw hnuah pawh an dang zui lo.

NGO-te'n May 31, 2022 aṭanga Mizoram CS dan an tum kha Mizo mipuiin an thlâwp lo viau niin a lang a, mi tam tak chuan an sawisel a ni. Mipuiin an thlâwp loh chhan hi, hnam dang ngaihtheihlohna vanga hmalakna nia an ngaih vang niin a lang.

Tunah pawh hian CS thar kan neih ngei a ngai dawn a, Mizoram sorkar hotute'n Mizo ngei dah turin sorkar laipui hotute ngen mah se, MHA hian Mizo a rawn dah kher lo thei. CS atan hnam dang an rawn dah a nih pawhin, hnam dang an nih vang ngawta lo duh loh a, lo dodâl tur a ni lo a, thil tih dan tur niin a lang lo; Mizoram tan taima tak leh ṭhahnemngai taka an thawh theih nan kan lo lawmin kan lo tichak zawk tur a ni. Chutiang tur chuan Mizo mipui leh pawl hruaitute'n rilru kan lo neih lâwk a ṭha.

Hna an thawk ṭha tâwk lo emaw, eirûkna leh hlemhlêtnaah an inhnamhnawih niin an lang emaw, Mizo hnam hmusit zawng leh ram leh hnam tana ṭha lo zawnga an chea hma an la a nih erawh chuan na taka dodal ngam erawh a ṭul thung. Mizo IAS officer kan nei tlem tawh a, CS atan Mizo ngei duh mah ila, kan dinhmunin a zir rih lo a ni tih kan pawm a ṭul bawk ang.