Medical Reimbursement

Chief Minister Lal Than­hawla chuan, Mizoram sor­karin damlo enkawl nan sum a seng nasa hle tih a sawi a; damdawia inenkawlna senso sorkar hnathawkte'n an hmuh lêt (reimburse) theih dan chu ennawn a, awmze nei zawka kalpui tum a nih thu a sawi.

Mizote hi mahni damloh nikhuaa hman tur pawisa khawl nachang hre lo tak kan ni a, pawisa lakluh tlem vang lam aiin a nachang hriat loh vang a ni mah zawk. Hnam dangah chuan rethei deuhte pawhin ṭul thuta hman tur pawisa khawl nachang an hria a, Mizote erawh helamah hian kan inhmakhua ngai meuh lo a, sorkar hnathawk lote phei chu kan talbuai ṭhin hle a ni.

Hei vang hian damlo hlekin sorkar hnathawk chhungte kan bêl a, a dik chiah lo thlengin medical reimbursement bill thei turin kan insiam rem a, damlohna thil a lo nih bawk avangin kan hmu lo der a ni ber mai. Hei hian sorkar leiba a tipung a, tuna kan kal dan en hian medical reimbursement kalphung hi siam ṭhat a hun takzet tawh a ni.

Sorkar hnathawkte'n an inenkawlna tawh phawt bill theih anga a awm pawh hi a dik lo a, ngun zawka ennawn a ṭha khawp mai a, bill theih chin leh bill thei chinte pawh thliar fel a ṭhat a rinawm. Hei bakah hian sorkarin medical reimbursement a tih theihna damdawi inte thleng hian ennawn a ngai a, Mizoram sorkar-a bill tur a nih chuan phai lama damdawi-in ṭhenkhat hian ṭul vak lo thlengin an en ṭhin tihte hi a tak a nih chuan a zialo hle ang.

Tuna kan kal ang dul dula kal a, sorkar bêla inenkawl tum vek hi chu kan kalsan a hun tawh a; sorkar hian medical reimbursement kalphung hi ennawn ngei se, thutlukna huai tak a siam pawh a hun tawh hial awm e.