E.Roll ennawnah fimkhur hle a ngai

Mizoram Electoral Roll 2025 atana electoral roll ennawnna chu ṭan a ni ta a, October 29, 2024 khan district tinah district election officer-te'n draft electoral roll an tlangzarh.

Electoral roll ennawn mekah hian thun thar turte thun belh tur a nih rualin, paih ngaite paih tur a ni. Thun leh paih dilnate chu bialtu ERO/AERO/BLO hnenah leh https://voters.eci.gov.in leh Voter Helpline application hmangin thehluh theih a ni a, November 28, 2024 thleng hun hawn a ni.

Tun hnai hun eng emawti aṭang khan Mizoramah document/certificate lem siam ṭhin an awm nual thu sawi a ni a; ṭhenkhat phei chuan langsar takin thil an ti a, social media-ahte pawh document an siam theih thu an tarlang ngam nia sawi a ni.

Document lem siam ṭhinte hian eng zata tam nge an lo siam tawh hriat a ni lo a, tute nge an siamsak ṭhin tih pawh hriat mai theih a ni lo. Mizoramah hian document/certificate lem kawl leh hmang an lo tam viau tawh a ni thei. Hetiang hi a nih avangin electoral roll ennawnna hi kum dang zawng aia fimkhur lehzuala kalpui a ngai.

Electoral roll-a awm hi India khua leh tui nihna tichiangtu pawimawh ber pakhat a nih avangin India khua leh tui dik tak ni si lo, electoral roll-a inthun luh tum si an tam viau thei. Document lem, a tak ang taka siam ṭhin an awm nual nia a lan avangin electoral roll-a inthunna tura lehkha pawimawhte nei ve thlap site pawh an awm nual mai thei. Electoral roll ennawnna kal mekah hian fimkhur a ngai tak zet a ni.

Electoral roll ennawnnaa fimkhur tur leh, India khua leh tui dik tak ni lote thun an nih lohna turin mipui ṭan tlân a ṭul. India khua leh tui dik tak ni si lo electoral roll-a inthun tum hriate chuan thuneitute hnenah thlen ila a ṭha hle ang.

Thil hrang hrangah hian a bulṭhuta an tlang tawh chuan a lêr lam aṭang chuan thil dik lo hmuh chhuah a harsa tawh ṭhin. Electoral roll ennawnah hian khua/veng tina BLO-te hi a bulṭhut an ni a, fimkhur chikima an fimkhur a ngai dawn; ram leh hnam hmangaihna tak tak thinlung nen, dik leh rinawm takin hna an thawk tur a ni a, chu chu an tihmâkmawh a ni.