Harsatna a ṭha zawnga hman

Mizoram leh Assam ramria buaina awm mekah state leh ram páwna Mizo páwl hrang hrangte'n thuchhuah siamin Mizote thlavâng an hauh a; Mizoram mipui puih an inhuam thu an tarlang hlawm.

Tun hnaiah Assam-in kan ram min chuhpui avangin harsatna an rawn siam a, hei vang hian lirthei pawh hun eng emaw chen an dang a, chu mai ni loin kan ram chhunga thilte tichhiain mawi lo takin an che a ni. Hetihlai hian Mizoram pawna awm Mizote'n he ram chhan an inhuamzia leh a chhunga cheng mipuite tana an ṭan tlatzia a taka an rawn lantir hi thil lawmawm tak a ni. 

Buaina leh harsatna hi a thim zawnga thlir theih a nih rualin a êng zawnga thlirtu tan chuan thil ṭha tam tak a hring chhuak tel ṭhin a, tun hnaia thil thlengah pawh hian state pawn leh ram pawna Zofate kan inpumkhatzia a takin a rawn lang leh ta. Chhan hrang hrang avangin Zofate hi rorelna hrang hnuaiah awm mah ila, hetiang hun harsa lo thlengte hian Zofate inpumkhatna kawngah nasa takin ke min pentir ngei ang tih a rinawm tlat a ni. 

Hetihlai hian a ram chhunga chengte zawk hian inpumkhat leh­zualna atan kan hmang ṭangkai lo palh ang tih a hlauh­awm a, politics-a hamṭhatna duh avang te, kan party hma kan ngaih luat avang leh chhan dang avangin ramri buai hian min tibuai tel lo se; he ramri buaina avanga harsatna lo thleng hi a ṭha zawnga hmanga inpumkhatna kawng sialtuah i hmang thiam ang u.