Cement-a kawng siam dilna bawhzui

Chief Minister-in October 26, 2024-a press conference a neih ṭumin, tun hnaia New Delhi-a Road Transport and Highways Minister a hmuhnaah alkatra (bitumen) hmanga kawng siam chu a tlo loh avangin Mizorama kawng zawng zawng chu cement hmang veka siam phalsak tura a ngen thu leh Union Minister pawhin a pawm viaua a hriat thu a sawi.

Chief Minister hian cement concrete hmanga kawng siam phalsak tura a ngenna chu ṭum danga an la ngen ngai loh a nih thu te, cement hmang veka siam a nih chuan fûr lai pawhin kawng siam theih a nih dawn bakah, kawng a tlo zawk tur thu a sawi a ni.

Mizorama mithiamte chuan alkatra hmanga kawng siam aiin cement concrete-a siam a tlo zawk niin an sawi. Hei hi a dik a ni tih cement hmanga Mizorama kawng siam tawhte aṭang pawhin a hriat theihin a lang.

Mizorama kawngte a tlo zawk theihna tura Chief Minister sorkar laipuia hma a la hi a lawmawm a, Mizoram tan thil ṭha tak a nih a rinawm a, hlawhtling ngei se a duhawm hle.

Tun ṭuma CM-in a dilna hi Union Minister-in pawm viauin lang mah se, an lo pawm tak tak dawn em tih hriat a la ni lo a, a hlawhtling nghal dawn em tih sawi theih a ni rih lo. Cement hmanga kawng siam dilna hi a hlawhtlin ngei theih nan sorkar hotute'n chak takin bawhzui se, mumal zawk leh ngawrh lehzualin dil se, awmzia a nei lehzualin a rinawm.

Hetih lai hian, Mizorama kan hmuh tawh chinah chuan alkatra hmanga kawng siam aiin cement concrete-a kawng siamte a bawl zawk tlangpui a, lirthei tan tlân a nuam lo zawk. Cement concrete hmanga Mizorama kawng zawng zawng siam theih a nih dawn pawhin, tuna kawng kan neih tawhte aia mâm zawk leh tlân nuam zawk tura siam dan ngaihtuah tel nghal ni se a ṭha hle ang.