Pawi khawihna ûm zui chak a ṭul

Mizoram police-te chuan document/certificate lem siam ṭhin nia hriat mi pakhat chu October 25, 2024 khan an man a, Vaivakawn Police Station-ah thubuai ziah luh a ni. An mi man hian document lem a siam ṭhin ngei thu police hmaah a puang nia sawi a ni.

Police-te'n document lem siam ṭhin zinga mi pakhat an man chhuak hi a lawmawm tak zet a; ram leh hnam himna atana pawimawh a ni. Fimkhur tur leh document lem siamah inhnamhnawih lo tura mipui an chah nghal pawh a lawmawm a, zawm ngei a pawimawh.

Document lem siam chungchanga police-te'n thuchah an nei nghal hi a lawmawm rualin, thuchah siamah ringawt tawp loin, a takin bawhzui se. Tuna document lem siamtu an man theih chhan hi zirlai pawl lamin an chhui a, finfiahna ṭha tak an neih hnua Home Minister hnena report an pek vang leh Home Minister-in hma a lak nghal vang niin a lang.

MZP-in Mizo hnam himna tura hma an la leh document siamtu man chhuak tura bawhzui a, finfiahna an nei thlap hi a lawmawm; thuneihna (power) neitu dik tak zawk leh bawhzui chak zawk tur police tih tur ni âwm tak leh police chhui chhuah tur zawk ni âwm tak a ni.

Thiamna a sang zel a, hmanraw ṭha leh changkang a awm belh zel a; thil sual leh pawi khawih theih dan thar a awm belh zel. Heng karah hian police-te'n ṭan an lak thar zel a ṭul a, document lem siam chungchangah pawh mi/pawl dang hmalak hnua bawhzui ve chauh loin, media hrang hranga thil awmte an chîk a, dan loa thil tih awm nia langte an bawhzui nghal chat chat zel a ṭul.

Document lem siam chungchangah chauh ni lo, dan bawhchhiatna awm thei thil chi hrang hrangah police leh sorkara hma latu tur dik takte'n an mit leh beng an lên nasat lehzual a, chak zawka hma an lak a ngai.

Dan leh thupek kenkawh kawngah pawlte hi hman ṭangkai thiam tur a ni a, chutih rualin, pawla innghah lutuk erawh a fuh ber lo a, sorkar leh hma latu tur dik takte chak lohna tilangtu a ni thei. Pawlin an bengvàr chawp ngai loin sorkara thuneitute'n ṭan an lak a, an tih turte an ti vat vat zel a ngai e.