Hlawh phua hnathawh

Mizoram sorkar hnathawkte chuan, April 1, 2015 aṭanga chhiarin Dearness Allowance pung an la dawn a; DA pung avang hian sorkarin thla khatah cheng vbc. 15 vel a sen belh dawn nia thu dawn a ni.

Mizoramah hian sorkar hnathawk an tam hle mai a, mipui tam lam aṭanga chhut phei chuan sorkar hnathawk tamna ber zinga mi kan ni. Mizoram budget-a a tam zawk hi sorkar hnathawk hlawhah leh an inenkawlnaah a kal a, hei vang hian sorkar hnathawkte hian ṭha taka an hna an thawh hi an mawhphurhna a ni.

Hetihlai hian sorkar hnathawkte hnathawh danah hian mipui kan lungawi lo tlang a, hnathawktu ṭha tak tak chu awm bawk mah se, sorkar hnathawk ṭhenkhat hi chu an inthlahdahin an hna an thawk ṭha lo hle. Heng mite an hmuh hian sorkar hnathawk ni ve lote rilru a na a, Mizoram bidget-a an chanai a tam em avangin mipuite zah vang tal pawhin hna hi thawk ṭha deuh se a ṭha ngawt mai.

Mipui vantlang hriatthiam ve dan, office kai hun leh ban hunah mai pawh dan an zawm hleithei lo a, office hunlaia thil danga chhuahte pawh an titawp thei lo. Heng thilah hian sorkar hotu lu lamin mawh an phur lian a, minister-te hi chu lut leh chhuak zut an nih avangin officer liante mawhphurhna a sang hle a ni.

Sorkar hnathawk mi tlem tê tana sorkar sum a kal tamzia en hian, sorkar hnathawkte hian an hlawh phuin hna thawk se, chutiang tur chuan an inenkawlna hi siam ṭha ngam se a ṭha ngawt mai.