Doctor-te fuihna thu kha

Health minister Lal Thanzara chuan thu sawiin, doctor-te chu sorkar hna dah pawimawh hmasa ṭhin tur leh doctor hna zahawmna hralhtu ni lo turin a chah a, "Ram a ṭhang zel a, private hospital leh clinic a tam chho zel hi a lawmawm hle, sorkar pawh a chhâwk viau a ni. Private hospital leh sorkar damdawi-ina thawk kawp tam tak in awm a, sorkara in thawh duh tak tak chuan sorkar hna dah pawimawh hmasa turin ka ngen che u a ni," a ti.

Health minister thusawi hi ngun taka ngaihtuah ngai, thil pawimawh leh doctor-te tan pawha zawm ngei chi a ni ang. Tun hnaiah Mizoramah mamawhna avangin private hospital changtlung tak tak a ding thar zel a, hengte hi mipuiin an chhawr ṭangkaiin sorkar pawhin nasa takin a chhâwk ngei ang. Henga thawktu doctor tam zawkte hi sorkar doctor-te an ni tho a, indaih lo taka damdawi-in hrang hranga thawk kawp doctor eng emaw zat an awm.

Sorkar doctor-te hnena sorkar hna dah pawimawh tura fuihna thu sawi a ngai ta hian thil awm dan a tichiang hle mai a, sorkar doctor ṭhenkhat hna danga inhmang miah lo an awm a, a ṭhente chu nasa taka pawn lama inhmang an awm a, mamawhnain a nawr vanga pawn lama hnathawk kawpte pawh an awm thei ang. Engpawhnise sorkar aṭanga an bang phal/ ngam/ duh a nih loh chuan, an hna hmasa sorkar damdawi-in hi an dah pawimawh ber tur a ni a, hei hi infuih thar zel a ṭul hle a ni.

Mizoram sorkar hnuaia hnathawk doc­tor ṭhenkhatte hi fakhlawh tak, mipui mamawh huna pan leh koh theih, miharsate a thlawna en mai duh­tawk loa sum leh damdawi hmanga ṭan­pui ṭhinte an awm a, an fakawm. Ṭhenkhat erawh mahni hna zawka tlai reng mai, sum dang hmuhna remchang private clinic leh private hospital lama hmuh tur awm reng site an awm ve thei bawk a, insiam ṭhat ngai doctor hi an awm ngei ang.

Health minister fuihna thu hi sorkar doctor-te hian hre reng se, an hna hi zahawm takin vawng zel se, sorkar doctor hna pawimawh hmasa ber chu sorkar damdawi-in leh sorkar programme-a inhman hi a ni tih hre zel rawh se.