HIV/AIDS dona kawngah kohhran

Tun hnaiah World AIDS Orphans Day hman a ni a, he huna thusawitu MSACS project director chuan, "Kohhran leh khawtlang kan ṭanrual chuan HIV&AIDS avanga harsatna tawkte hi pawn lam aṭanga ṭanpuina pawh lo tawp thut se hma kan la chhunzawm thei dawn a ni. Tun aia mipuite nasa zawka kan inhawn chuan HIV&AIDS avanga harsatna kan tawh mek te kan titlem thei ang," a ti.

HIV/AIDS hi kan ramah a lo lut tawh a, a chhuak leh tawh dawn lo. A darh zau zel lohna tura inven hi kan tihmakmawh a ni a, keimahni sum leh theihnaa theihtawp chhuah tur kan ni chungin ram pawn aṭangin ṭanpuina eng emawzat kan dawng ṭhin. Tun hnaiah HIV/AIDS donaa sum lo lutte a tlahniam hret hret a, hei vang hian HIV/AIDS dona hnathawh hi kan tihtlem ve hret hret a remchang si lo a, chuvangin Mizoram mipuite kan ṭanruala HIV/AIDS do tura tha kan thawh nasat a ngai zual sauh dawn a ni.

Mizoramah chuan kohhran hian hmun pawimawh a chang a, kohhran thu hian zah a hlawh a, Biak Inte hi inzirtirna hmun ṭha ber pakhat a ni. Kohhran kan dah pawimawh avangin a thu pawh kan awih a, kohhranin ṭan a lak tawhna lam hi chu a sawt pawh a sawt viau ṭhin. HIV/AIDS dona kawngah pawh hian kohhran hi a chêt tak tak chuan awmzia a nei thui dawn a, tuna zawi zawia kohhran a inrawlh chinah ringawt pawh hian an thawhhlawk hle a ni.

Ram pawn aṭanga HIV/AIDS dona tur sum lo lut hi eng tik hunah pawh tawp thei a ni a, hetih hunah hian sorkar lamin sum thehchhuah tur nei ta lo se, Mizoram chhan tura ke pen tur chu kohhran a ni lo thei lo. Kohhran hian tun aṭangin HIV/AIDS dona hi tun aia chak hian kalpui se, Mizoram kohhran inlungrualin ṭan an lak chuan HIV/AIDS sut kianna kawngah a pawimawh ber an ni thei hial ang.