Misual hremna dan nge chhanna dan?

YMA Central Executive Committee chuan ruihhlo leh damdawi kheh vanga mante jail-ah an tàn rei loh bakah hremna mumal a awm ṭhin lo niin an sawi a, "Central YMA chuan pawi a ti a, dan ang taka hremna lekkawh a nih theihna atan sorkar thuneitute sawipui ni se," an ti.

Tun hnaiah Mizoramah 'khehpuam' an tih mai, pseudoephedrine tawlh ruk kaih­hnawihah mi eng emaw zat man an ni a, heng an mi man zinga a tam zawk hi chu tan inah pawh awm mang loin an chhuak leh thei mai. He damdawi hi ruihhlo chu ni chiah lo mah se ruihhlo siamna hmanrua niin an sawi a, ruihhlo siamna damdawi hmanga sumdawn hreh lote hi mipui chuan ruihhloa sumdawng tlukpui ang thoin an hmu a; nimahsela dan mit aṭanga thlirin ruihhlo tawlhtu an ni lo emaw ni, awlsam takin an fihlim thei deuh zel.

CYMA-in ruihhlo kaih­hnawiha mante an fihlim leh mai ṭhin an ngaimawh hi a dik chiah a, kan ram leh hnam hmelma damdawi tawlhru duhtute awlsam taka an fihlim hi chu a ngaimawhawm takzet a ni. Chutih rualin an zanlen hma theih dan lam hi ngun zawka zir chian a ṭha a, court hmaa an dina thiam loh chang loa an chhuah theih chhante pawh hi dan aṭang bawka zir chi a nih hmel a, ngun taka ngaihtuah chi a ni ang.

Dan hi a hmangtu a thiam phawt chuan misual hremna dan ṭha tak a ni thei ngei a, chumi tlukpui chiah chuan a ukil lamin an zir chuan misual nia kan puhte chhanna dan ṭha tak pawh a ni thei. Tun hnaia CYMA-in an ngaimawh, ruihhlo kaihhnawiha mante jail an tang rei lo ṭhin pawh hi dan thiamte zawk hian chonaah ngaiin uluk taka zir chian ni se, misualte chhanna dan anga an hman hi misualte hremna danah pawh a chantir theih lo maw?