Ei leh in tur siamna hmun endik

Aizawl Municipal Corporation-a Committee on Regulations of Restaurant, Hotel & Hostel chuan Aizawla hostel, hotel leh thingpui dawrte chu November 2024 thla laihâwl vel aṭangin sawi lâwk loin an endik ṭhin dawn tih November 4, 2024 khan an puang.

AMC hotute sawi danin, Aizawla hotel 148, hostel 148 leh thingpui dawr 819 chu AMC-ah an inziak lut a; inziak lut lo pawh an nualin a rinawm.

AMC-a thuneitute'n an endik turah hian AMC-ah registration an tih leh tih loh te, signboard-ah license number tarlan a nih leh nih loh te, ei tur siamte a thianghlim leh thianghlim loh te, hmunhma a fai leh fai loh te, bawlhlawh an thliar dan te, dan an zawm dante enfiah a ni dawna sawi a ni. Hotel leh hostel-ah mutbu dinhmun leh tui chungchangte pawh enfiah an tum bawk.

Aizawl khawpui a ṭhang zel a, a chhunga chengte pawh nasa takin an pung. Dawr leh sumdawnnate a pung nasa a, chu'ng zingah chuan ei leh in tur siamna leh zawrhna dawr lam hi ṭhang nasa leh pung chak pâwl tak a nih a rinawm a, mipui hmuh theih china fai leh mawi tak takte pawh a tam tawh a ni.

Hetih lai hian, mipuiin an hmuh theih loh chin - ei leh in tur an siam dan leh sawngbawl dan erawh thianghlim tâwk loa ngaih theih leh a hmunhmate pawh bàl leh ṭawp tak tak a awm nual niin a lang. Ei tur siamna lai tak hmunhma leh mipui tana lang thei chin lan dan a inthlau tlangpui.

Ei tur siamna hmun a faia a thianghlim loh chuan an ei/in tur siamte pawh a thianghlim tâwk lo thei. Hotel, hostel, restaurant leh thingpui dawr neitute'n faina leh thianghlimna an ngai pawimawh tur a ni a, mipui tana lang thei lo chinte pawh fai takin an enkawl tur a ni.

Ei leh in tur enkawl fai leh thianghlim hi mahni chhia leh ṭha hriatna aṭang pawha tih ngei tur a ni a; mahse, mi tam tak chuan an ti lo niin a lang. Chuvang chuan, AMC-a thuneitute'n an endik tur hi a lawmawm a, theihtawp han chhuah se. Endik ringawtah duh tâwk loin, dan ang takin che se, khawng takin dan lekkawh ngam bawk rawh se.