Aizawl khawpui cheina

Aizawl Municipal Council chuan Aizawl khawpui chhung hmun pathumah kea kalte kawngpui kânna tur lei, fly-over bridge siam a tum a, tun hnaiah thuneitute'n an endik.

Khawpui lian dangte ang bawkin Aizawlah Minicipal Council a ding ta a, anni hian hna an thawh tak tak chuan khawpui hmel tidanglam thei khawpin theihna an nei. Khawpui lian dangah pawh hian a khawpui area chhunga thuneitu zawk hi sorkar nge an Municipal Counbcil tih hriat hran harsa khawpin Municipal Council hian hna an thawk a, hnathawhna tur sum an neih bawk avangin an kutah khawpui hi a innghat lian hle.

Aizawl khawpui hi kawng hrang hrangin chei a ngai a, ruahmanna ṭha nei loa din a ni si a; mipui, in leh lirthei a pung chak si a, hei vang hian chei a harsa a, tih tur pawh a tam hle. Tun hnaiah maxi cab dinna sawn a nih vang ringawt pawhin sawiselna a tam a, AMC-in khawpui cheina tura ke a pen dawn hlekin mimal leh pawl dotu an nei fo mai.

Khawpui hian cheitu a mamawh a, chu chu AMC hi an ni. AMC hian huaisen taka ke an pen ngam a ngai a, tun hnaia fly-over bridge siam an tumte pawh hi tute in leh dawr emaw tan chuan a hnawk dawn a ni mai thei a; nimahsela khawpuia cheng mi tam zawk tana thil ṭha a nih dawn chuan an tihtlang zel a ngai.

Khawpui ni tura duan lawk ni si lo, khawpui lian lo ni ta Aizawl hi kawng hrang hrangin chei a ngai nasa a, chumi titu tura mawhphurhna neitu AMC hian tim loin thawk se, khawpui tana ṭha turah chuan huaisen takin kal ngam rawh se.