All India Service cadre hran neih

Mizoramin all India service cadre hran a neih ve theih dan tur chungchang tun hnaia sawihonaah, Mizoramin cadre hran a neih chungchang chu cabinet meeting-ah telh a nih tur thu Chief Minister-in a sawi.

Chief Minister hian, Mizoramin all India service cadre hran a neih ve chu a kaihhruai sorkarin a duh leh a rualawhna a nih thu te, nasa lehzuala bawhzui a duh thu te, cabinet meeting-ah sawiho tura chhawp chhuah a tum thute a sawi nia tarlan a ni.

All India service-a Mizoramin cadre hran a neih hi a ṭhatna tam tak a awm ngei niin a lang a; chutih rualin, ṭhat tawk lohnate pawh a awm ve thei tho bawk ang. Mi tam takin a ṭhatna leh ṭhat lohna an bûk a ni.

Mizoramin all India service cadre hran a neih hi Mizo zinga all India service officer kan zinga a tam ber chuan ṭha an ti a, an duh niin a lang. Mizo mipui, all India service chungchanga thil awmzia tak tak hrethiam, ngaihdan mumal tak nei chin zingah pawh cadre hran neih ṭha ti leh duh an tam niin a lang bawk.

Mizo mipui tam zawk leh all India service a taka luhchilh tawh tam berin ṭha an tih leh an duh a nih avangin cadre hran neih hi Mizoram tana ṭha zawk turah a ngaih theih.

Chief Minister-in ṭha an tih thu a sawi tawh a, sorkar hotute'n ṭha an tih leh an duh hi Mizo mipui tam zawkin an duh nia a lan bawk avangin cadre hran neih a nih theih nan Mizoram sorkar hian chak zawkin bawhzui se a, cabinet-ah pawh pawm ngei se a duhawm.

Cadre hran neih hi sorkar laipui thuneihna a nih avangin sorkar laipuiah pawh ngenngàwl a ṭul ang a, a nawra nawr pawh a ṭul thei ang; chutiang tur chuan Mizoram sorkar hian ngaih pawimawhah neiin a bawhzui ngei tur a ni ang.