Buaina chinfel nge kan duh ramri chinfel?

Ministry of Home Affairs Joint Secretary hoin tun hnai khan Silchar-ah Mizoram leh Assam Home Secretary-te ramria buaina chinfel dan ngaihtuahin an inbia a, he mi hnu hian MHA Joint Secretary hi Mizoramah lo zinin sorkar mi pawimawhte a be bawk. 

Tunah hian Assam nen ramri chungchangah buaina kan nei a, sorkar laipui lamin an ngaih pawimawh ber nia lang chu buaina awm chinfel phawt hi a ni. India ramah hian state tam takin ramri buai an nei a, vawi leh khata chinfel theih a ni lo tih an hre chiang a, an duh ber chu buaina chinfel hi a ni. 

Hetihlai hian Mizo mipuite hian buaina chinfel ringawt lam aiin ramri chinfel hi an duh zawk ang tih a lang reng tawh a, tun hnaia buaina awm pawh hi Assam lam bul ṭan vek a ni zawk. Kan ramri hi chinfel a la ni lo chungin buai loin rei tak chu kan awm thei a, kan ram chhung min rawn chuhpui avangin buaina a chhuak ta a ni. 

Hetihlai hian tuna buaina chinfel ringawt hi kan duhtawk a nih chuan Mizoram sorkar, Council of Minister ṭhukhawmin, 'ramri atan 1875 kan pawm,' an tih kha awmze nei loa mawi zawnna mai mai tih a lang reng dâwn a; kan ramri ber pawh kawk chiang ngam lo leh kan sorkarin a pawm ramri pawh hauh ngam loa 'buaina chinfel' tih ringawt kan duhtawk dâwn a nih chuan eng tikah emaw buaina a la chhuak leh ngei ang tih a rin theih. 

Hetihlai hian buai­na chinfel hmasak hi chu thil ṭha leh hmanhmawhthlak tak a ni. Remna zawn hi a puitlingin mipui pawhin buai loa awm hi chu an duh ngei ang; amaherawhchu buaina chinfel lailawka kan buai chhan ber ramri tihfel si loh hi chu nakina buai leh tura thil hnutchhiah ang chauh a ni thei a; kan sorkar neih tawhte hian an hunlaia a buai loh chuan ramri hi chu chinfel ni kher lo mah se an ngawih bopui thei zel dâwn a nih chuan a vanduaithlak ngawt ang.