Media hnathawktute mawhphurhna

Mizoram Journalist Asso­ciation chuan Kolasib-ah general conference a hmang a, Mizoram district hrang hrang aṭangin journalist-te an kal khawm a, thu pawimawh tak tak an rel.

Journalist-te hi an pawi­mawhna sawi ṭhin a ni a, democracy ramah phei chuan sorkar vengtu leh sorkar khalh ngiltu ber niin an sawi. Au chhuahna nei ve lote tana au chhuahna, an dikna puanchhuahna remchang, mirethei leh hnuaihnung zawk­te lamṭang anga sawi a ni bawk.

Journalist-te pawi­mawhna leh ṭang­kaina lam hi sawi a tam tawh a, an mawh­phurhna lam sawi uar tel hi a ṭha khawp mai. Tun hma deuh phei kha chuan journalist-te kaltlang lo hi chuan mipui hriat tur puanzar theih a ni mang lo a, tun hnaiah social media hrang hrang a chhuah hnuah hi chuan thil a danglam ta deuh.

Inbiakpawhna, thuthar thehdarhna leh ngaihdan puan chhuahna hmanrua ṭha tawlh tawlh mah se, tun hma aṭanga mipuite'n chanchinthar an dawnna ber radio, TV leh chanchinbute hlutna hi a la tlahniam tak tak lo a, mipuiin rintlakah ngaiin an thute an la ngaichang zel a ni. Hei vang tak hian journalist-te hian an mawh an hriat chian a, mipui hnenah thudik leh rintlak chiah an puanzar a, ṭan lam leh âwn lam nei lo thei ang bera an kal a ṭul hle a ni.

Tun hnaiah online journalist-te pawh an chhuak thar zel a, heng mite leh tun hmaa 'journalist' tiin a huam china thawktute hian mawhphurhna ang khat vek an nei a, mipuite hnena thudik leh rintlak hrilh hi an mawhphurhna a ni a, mimalin ṭan zawng leh ṭan loh zawng an nei a nih pawhin news report-ah chuan a lai thei ang bera kal tum se, mipui hnenah thudik chauh puang ṭhin rawh se.

Hetihlai hian hriat zawng zawng puanzar vek hi a finthlak lo a, journalist ṭha chuan puan tur chin leh puanzar vek ngai kher lo chin pawh a thliar thiam tur a ni a, Mizorama journalist-te hian inzirna tur hmabak an la ngah hle a ni.