Thlai hralh/lei leh suma inbuatsaihna

Tun hnaia Mizoram Agricultural Marketing Board buatsaiha Bána Kaih (Handolding) scheme hnuaia hmalak dan leh, thlai thar hralh dan tur chungchanga inràwnkhawmnaah Chief Minister-in thlai hralhah harsatna a awm loh nan sorkar chu; sumah a inrin reng tawh thu leh thlai leitu turte'n an dawn hniam vak loh nan ruahmanna siam a nih thu a sawi.

Mizorama thlai tharte ṭha tak leh tluang taka hralh a nih theih nan kawng ṭha a pawimawh a, kawng a ṭhat loh chuan chêt a harsa a, hmalakna a chak loh phah ṭhin. CM-in thlai tharte hralh a hun hunah kawng ṭha nei hman turin rilru zawng zawng nen theihtawp an chhuah thu a sawi a, a lawmawm.

Sorkar flagship programme a hlawhtlinna tura sorkarin ṭan a la zel hi a ṭha a, an tih tur pawh a ni a; a hlawhtlin ngei theih nan Mizoram mipui tana inpekna thûk zawk nen hma an lak zel a la ngai.

Thlai thlan bik palia kut hnathawktute thar chhuahte rate bituk ang taka hralh a nih leh nih loh hi mipuiin sorkar an thlirna leh an tehna a ni dawn a; sorkarin inthlahdah leh namnûl nei loa theihtawp a chhuah zel a ṭul dawn.

Thlai thar hralh leh lei chungchangah hian beisei leh rin lâwk loh harsatna awm palh thei a ni. Harsatna awm thei zawng zawng hmachhawn turin sorkar leh mawhphurtute an inbuatsaih a ṭul ang a, harsatna hneh turin inpekna thûk tak nen hma an lak zel a ngai ang.

Sorkar flagship programme hnuaia thlai thar lei leh hralha kut hnathawktute puih hi kumina thlai chìnte chauhah a ni lo a, tuna sorkar ding mek hun chhung, kum nga chhung atan a ni. Sorkar hian an sorkar chhung zawnga an hmalakna turte uluk tak leh fimkhur takin an duang tur a ni.

A pawimawh ber chu - kut hnathawktu leh loneitu, hah tak leh rim taka thawkte'n an thawh phû tâwk hlâwkna an neih a ni a; chutiang tur chuan sorkar hian theihtawp han chhuah zel teh se.