Sorkar hnathawkte thubuai

Kau-Tlabung Mini Hydel Project leh Tuipanglui Mini Hydel Project siam thawhnaa eiruk thubuaia High Court thu­tlukna chu Mizoram sorkarin Supreme Court-ah a khing a, hei hi Supreme Couirt-in a hnâwl.

Mizoramah hian eiruk thubuai kan han tih mai hi a awm ve zauh zauh tawh a, eiru hrem thu erawh hriat a tam lo a, mipui nawlpuiin kan hriat meuh hi chuan an chingfel tawh a nih loh pawhin eirua an puhte hi an fihlim a lo ni deuh zel. Eiruk avanga hremna tawk hi an tam lo a, eirukna erawh a hluar a ni tih Mizoram sorkar hnathawkte hausak dan aṭangin awlsam takin a hmuh theih.

Tun hnaia PRISM lamin an umzui, Kau-Tlabung Mini Hydel Project leh Tuipanglui Mini Hydel Project thil hi a chin chhuaka hre lo tan chuan thil awm dan hriatthiam a harsa a, inhnamhnawih nia lang chin ringawt pawh hi engineer rual ṭhahnem tak an awm a, court lamin eng tin nge a kalpui zel dawn tih hriat chian a châkawm tawh hle a ni.

Sorkar project-ah thil fel lo a awm hi chuan a project khawihtu zinga a lu ber aṭanga a khawitu tawh phawt chu an hming a lang fo ṭhin a, an zavaiin an eiru vek emaw, an zavaiin an fihlim vek emaw tihna a la kawk lo. Court lamin thil awm dan a chhui chian felah thutlukna a siam ang a, chumi hunah chuan thil awm dan chiang zawk a la lang dawn a ni.

Engpawhnise tun thilah kher lo pawh sorkar hian a hnathawkte hi a chhanin thubuai siamsak hi a hreh hle niin a puh theih a, mi naran pawhin an hlawh leh an thil neih a inbuk tawk lo tih an hriat chiante ngei pawh sorkar lam chuan chhan ṭha tak a hmuh loh chuan a chhui zui ngai meuh lo. Tuna Supreme Court-a sorkar zualko zel pawh hian chhan eng emaw chu a neih ngei hmel a, PRISM thuchhuaha a lan dan hi chuan sorkar hian a hnathawkte hum dan hi theihtawpin a zawng a ang ber.

Tunah chuan court-ah engkim a awm tawh a, thutlukna siamtu tur chu court a ni a; thuremna kimchang a chhuah hunah mipuiin thil awm dan an hrethiam chauh dawn a nih hmel.