Kohhran/páwla inhman leh ni tin hna

Chief Minister chuan November 8, 2024-a Mizoram Secretariat Service Association inkhawmpui a hmanpuinaah, kohhran leh pawla inhman dan tâwk thiam turin sorkar hnathawkte a chah.

CM hian sorkar hnathawkte pawl leh kohhrana an inhman nasat lutuk chuan hnain a tuar thei tih a sawi a, "Inhman dan tâwk kan thiam a ṭha. Thawhpuite kêp ngai reng, mahni thawhna hmuna hmuh harsa tak nih a hlauhawm. Kan hna hi kan rawngbawl nana Pathianin min hûnna a ni," tiin a sawi.

Kohhran leh pawla inhman chungchanga CM thusawi hi a pawimawh hle. Kohhran leh pawla kan mawhphurhna leh chanvote hian kan ni tin hna a tihbuai loh a ṭha ber a, insiamrem thiam a ngai. Pawl leh kohhrana nihna avangin hna aṭanga chawlh a ṭul a nih pawhin, dan ang tak leh mumal takin chawlh lâk ṭhin ni se.

Dan ang taka chawlh lâk theih a nih rual hian, chawlh zin lutuk erawh a ṭha lo a, hnain a tuar thei. Hnathawhna hmuna awm loh avang leh tih tur tih loh avangin miin harsatna an tawh phah thei a ni tih hriat reng a ṭha. Thawhpuite kêp ngai reng nih hi thil dik lo leh zahthlak a ni a; hetiang miteah hian thawhpuite leh mi dangin 'Isua hmel' an hmu lo ṭhin.

Pawl ṭhenkhat hruaitu zingah sorkar hnathawk an awm a, chu'ngte chu sorkar hnaa hna sang tak thawk an ni vek lo. Sorkar hnaa anni aia sang daih leh zah taka an biaka an dâwr turte páwla nihna hmachhuana zah lo taka ṭawng khum leh chêt khumte awm palh thei a ni; chutiang ti lo tur chuan fimkhur a, inven a ṭha.

Sorkar leh a hmalakna dodâl leh sawisel zawnga pawl hmanga hmalak chiamte awm palh thei a ni; chu'ng lakah chuan sorkar hnathawkte an fimkhur a ṭha. Pawl hruaitu ni mah se, sorkar hnathawk an nih angin danin a phuar reng tho a ni tih hriat reng tur a ni.