Mizoram leh Governor

Sorkar laipui chuan Mizoram Governor turin Arunachal Pradesh Governor ni lai Lt. Gen. Nirbhay Sharma a ruat thar a, Governor term kum thum a la neih chu Mizorama hmang zo tura tih a ni. Ani hi kum 2014, July-a Vakkom Purusothaman-a'n Mizoram Governor hna a chhuahsan hnua Mi­zoram Larsap atana ruat pasarihna a ni.

Tun hnaiah sorkar laipuiin Mizoram Governor thar a ruat zing hle a, hei hi Mizote min tham lohna anga ngaiin pawl ṭhenkhat chuan lungawi lohna an lantir hial tawh. Governor hi state pakhata thuneitu sang ber ang an ni a, heti teh seka Governor ken neia kan nei lo zeng zung mai hi chu a zia lo hle mai a, tuna Governor thar kan nei thei tur hi a lawmawm hle a ni.

Governor thar lo awm tur pawh hi NDA sorkarin an duh ang an ruat pawh a la ni chiah lo a, UPA sorkar laia Governor atana an ruat tawh, state danga Governor hna thawklai a ni a, a hun neih hi a hmang tluan dawn nge dawn lo hriat a ni lo. Mizo mipuite'n an duh chu Governor nghet neih ve tawh a ni a, India sorkarin a ram chhung state pakhat a enkawl dan hi a mak zozaiin intham lohna anga puh awl tak a ni.

Governor nihna zahawm tak pawh fiamthu thawhna ang maiah mipuiin an ngai zo dawn a, NDA sorkar hian Mi­zorama Governor lut chhuak sek hi an ngaimawh lo mai ni loin an tilui ang hiala puh pawh awl tak a ni. Tuna Governor thar tura ruat hian a hun neihte hi ṭha takin hmang tluan se, Mizoram leh a mipuite hian state dangte ang bawkin Governor nghet neih hi a phû a ni.