Mi dang hnena tourist lodge hlan

Mizoramah 5-star hotel a la awm lo a, 5-star hotel awm ngei se duhna avangin Chaltlanga Tourist Lodge chu mi dang hnena hlan (outsource) tuma hmalak mek a nih thu Tourism Minister-in a sawi.

Mizoramah, a bikin Aizawlah hotel ṭha leh changkang tak tak awm tawh mah se, 5-star hotel erawh a la awm lo. Mizoram hi India rama state 28 zingah 5-star hotel awm lohna awm chhun a ni lo mai thei a, 5-star hotel la awm lohna state dang a awm a nih pawhin, pahnih khat bak an ni kher àwm lo e.

Mizoram, state pakhat ve riang ruangah 5-star hotel a la awm lo hi tlàwmthlak riaua ngaih theih a ni mai thei. Hmasawn zel tum kan ni a, khualzinte nasa zawka hîp luh tum leh intawhkhawmna leh thil tih khawm lian thamte pawh la thleng zel tur kan ni. Chuvang chuan, hotel changkang leh lian ṭha pakhat tak neih ve hi a àwm hle tawh.

5-star hotel nei turin tute'n emaw hma an lak a ngai. Mimal emaw, pawl emaw, Mizoram chhunga chêng nghette aṭang chuan din a harsa rih mai thei a; hotel enkawlna lama thiamna leh tawnhriat nei ṭha bik tan lo chuan thil harsa takte pawh a ni ang. Chuvang chuan, state pawn lam mi, thiamna leh tawnhriat nei ṭha tawhte an rawn luh theih dan kawng hawnte pawh a ṭhain a rinawm.

Chaltlang Tourist Lodge hi mi dang enkawltir a, 5-star hotel atana siam tumna hi thil ṭha tak a ni thei a, ṭhenkhat chuan a uiawm ti zawngin an ngaihtuah bawk àwm e. Mizoram hmasawnna tur a nih phawt chuan 5-star hotel atana siam hi thil ṭha zawk a ni thei ang.

Chutih rualin, mi dang hnena Chaltang Tourist Lodge hlan hi politics-a inbeihna atan leh sorkar beihna atan mi ṭhenkhat chuan an hmang duh mai thei; 'Mi dang hnena hralh' ti zawnga sawite pawh awm theih a ni.

Mizoramah tourist lodge tam tak a awm a, chung zinga eng emaw zat chu hun kal tawhah khan sorkarin mi dang hnenah a lo hlan tawh a ni tih hriat tel a ṭha ang. Chaltang Tourist Lodge mi dang hnena hlan tumnaa pawimawh ber chu - ramin a hlâwkpui dawn em, tih hi a ni.