Grape hralhna zawn a ngai

Horticulture minister PC Lalthanliana chuan May 14 khan Champhai Grape Growers' Society (CGGS)-in grape tui an sâwr (grape juice concentrate), Radiant Manufacturers Pvt. Ltd. hnena an hralh hmasak ber tur litre 16,000 chu a vai­liam. CGGS-ah hian chhung­kua 279 an inziak lut a, Radiant manu­facturers nena kum hnih thawk dun turin inremna an siam a, litre khatah Rs. 50-in an hralh.

Mizoram khaw chhak lam hmun ṭhenkhatah chhung­kaw tam takin grape hi eizawnna atan an hmang a, ṭhenkhat phei chuan an din­chhuah phah mai piah lamah an hausak phah ṭan der tawh. Mizorama zu khap burna hman a nihlai pawhin grape chingtute hi chuan duhsak an hlawh a, grape tui sawr chu hralh a nih theihna turin dan pawh siam danglam a ni.

Tunah chuan Mizoramah dan anga zu zawrh a ni ta a, hei hian grape tui hralh kawngah nghawng a nei ngeiin a rinawm. Grape tui an zawrhlai khan mi ṭhenkhatin damdawi atan, chaw ei tuina atan leh ṭhian inkawm hlimnaah hmangin grape tui an in ṭhin a; nimahsela mi tam tak chuan ruih tumin an in a, heng mite hi chuan zu pangngai zawrh a nih hnu hian grape tui hi an lei zui vak kher lo thei.

Hei vang hian grape chingtu lam hian an grape hralhna tur hi hmanhmawh taka an ngaihtuah a ngai a, kan ramah hralh a kal reng lo a nih pawhin state pawnah hralh theih a nih hmel a, he lam hi kan dap chak a ṭha hle. Tunah CGSC-in inremna ziaka state pawn lama grape hralh nachang an hria hi a lawmawm a, sorkar pawhin grape hralhna hi zawn belh zel se, chhungkaw ṭhahnem takin eizawnna atana an thlan tawh a nih vangin grape hralhna zawn hmuh belh zel hi a ṭul hle a ni.