Hun vawng dik thei lo sorkar hnathawk

Chief secretary Lalmalsawma chuan, sorkar hnathawk zawng zawngin pisa kai hun chung­changah ṭan an lak thar a ngaih thu a sawi a; sorkar hnathawkte chu hna thawh hun chhung (office hour) dik taka vawng turin a chah.

Mizoram sorkar hian vawi tam tak chu a hnathawkte hi hun vawng dik turin a chah a, tuna chief minister ngei pawh hian sorkar officer liante ko khawmin hun vawng dik turin a lo chah tawh. Chuti chung chuan tun thlengin sorkar office tam takah ṭan hun dikah hnathawktu an thleng kim ngai lo a, ban hun hmain a ruak huai ṭhin bawk.

Sorkar hnathawkte hlawh atana Mizoram budget a kal tam dan en hi chuan sorkar hnathawkte hi chuan mipui zah vang tal pawhin an hna hi rinawm taka thawk tur an ni a, an chhia leh ṭha hriatna hmang pawhin an eizawnna a nih vangin ṭha taka thawh hi an tih ve tur a ni. Chuti chung chuan ṭan huna office thleng hleithei lo hnathawktu an tam lutuk hi chu a pawi hle a ni.

Tun hma deuh aṭang tawhin sorkar officer liante zawk hi chu a hun vawng dikah hian an ṭang duh viau a; nimahsela an hnuaia hnathawkte office kai hun dika an thlentir thei lo a nih chuan a hotu lam hi an thiam tawk lo tihna a ni ve tho. Mahnia hun vawn dik mai hi a tawk lo a, an hnuaia mite chu a hun taka an hnathawhna hmun thleng turin an hrilh­in an kaihruai thei tur a ni.

Office-ah hna a awm emaw awm lo emaw, sorkar office hian hun bi a nei a ni tih sorkar hna­thawkte hian an hriat chian a ngai a; sorkar office hi a hun taka ṭan a, a hun taka chhuahsan tur a ni tih hi inhrilh nawn mai duhtawk lo a, a taka lantir tura invil hial pawh a ṭha tawh awm e.