Ṭawng thiam

Sorkar sikul leh zirlai harsa zawkte tihhmasawn nan, pawl 6 chin chung lamah zirlaite lehkha zirtir nan English hman a ni dawn tiin School Education department chuan tun hnai khan hriattirna a chhuah.

He thutlukna hi Edu-cation Reforms Commission rawtna zûlzuiin kalpui a ni a, zirna kalpui dan zir chiang tura tih mithiam rualte hian medium of instruction atan English hman tur tiin an rawt a, chu-vangin a ṭha zawk turah ngai phawt ang. Anni rual hian Mizoram dinhmun leh India dinhmunte thlir chungin thil an kalpui turah ngai ila, he rawtna awm hi a hlawk leh ṭangkai thei ang bera hman i tum ang u.

A pawimawh ber chu eng ṭawng pawh hmang ila kan thiam bel tur a ni a, Mizo zirlai tam tak hi ṭawng thiam bel nei lo an ang ber. Mizo ṭawnga zirtir an nih pawhin thiam lo tak tak an awm zel a, a ziah dan takngial pawh hre mang lo Mizo medium school chhuak hi kan nei duah ṭhin. Hei aia pawi chu English medium school-a kal ve si, English ṭawng hleithei lo, a ziah pawh ziak thiam mang lo an tam lutuk hi a ni.

English hi kan pianpui ṭawng a ni lo chung hian inzirtirnaa kan hmang a nih chuan tun aia kan thiam hi a ṭul a, English-a inzirtir ve si, zirlai pawh hrethiam lo, a ṭawng pawh ṭawng chhuak thiam loa kan chhuah palh a hlauhawm hle a ni.

Mizo a ni emaw, English pawh ni se kan zirlaite hian ṭawng hi an thiam bel tur a ni a; a bo lo tawka hrethiam ve satliah ni lo a, a thiama thiam tak tak tura ṭan lak a ngai a, tunlai khawvelah ṭawng thiam hi a pawimawh takzet si a.