College admission indilpui

Zirlai pawl pahnih - Mizo Zirlai Pawl leh Mizo Students Union-te chuan pawl 12 pass tharte'n college admission an hmuh vek theihna turin ṭan lak an tum a, sorkar chu ruahmanna fel tak siam turin an ngen.

Zirlaite'n college kal ngei tumin pawl 12 an zir a, an pass tawh hnua college kalna an hmu lo ṭhin hi thil pawi tak a ni. Chutihlaiin college admission hi indilpuia insawisak chi a ni nge ni lo tih hi ngun taka ngaihtuah a ngai.

Zirna bulṭhut, ele­mentary education hi chu mi zawng zawng tan a ni a, naupang zawng zawngin zirna hi an nei ngei tur a ni. Chutihlaiin zirna sang zawk, higher education hi chu mi zawng zawng tan a ni chiah lo a, mi thiam bikte leh kal zel tlak khawpa exam-a tiṭhate tan a ni tih hi pawm thiam a ṭha. University-ahte phei chuan graduate zawng zawng luh theih a ni lo a, mark hmu sang leh under graduate zirnaa tiṭhate chiah luh theih a ni.

Tun hnaia college admission-a kan buaina ber hi chu college hmuh zawh loh vang pawh a la ni chiah lo a, Aizawl khawpuia college-a kal vek an tum vang a ni ber mai. Mizoram khawpui danga college-ah seat a awmlaia Aizawla luh tum, admission hmu phak lote lo buaipui luai luai hi zirlai pawlte tih tur a ni chiah em, tih pawh ngaihtuah a ngai. Zirnaa tiṭha lo, college-a admission hmu phak lote hi state dang khawpui lianah chuan an insawipui kher awm lo e.

Hetihlai hian sor­kar mi pawimawh ṭhenkhatin college admission chang lote seat an dilsak niin an sawi a, college zirtirtu ṭhenkhatin 'quota' nei ang hrimin seat an lo pe ve bawk a, hengte hi thil fel lo tak a ni zawkin a lang. College admission hi a duh apiang tan awlsam taka hmuh theih a ni lo a, college ṭha neih duhte phei chuan cut off mark siamin an inhung ṭhin a ni zawk a; pawl 12 exam dawnah college ṭhaa luh phak ngei tuma inzir tura chah hi a fuh zawk ang.

College admission hi zirlaiin a exam result aṭangin a zawng tur a ni a, pawl anga indilpuia insawipui hi zirna quality tihchhiatna a ni palh ang tih a hlauhawm hle.