Hmasawnna hnathawh muang

Mizoram Legislative Assembly-a Subject Committee-II member-te'n November 13, 2024 khan Aizawl City Center Annexe (New Market) sak mek an endik.

Endiknaah hian Subject Committee chairman Lalchhuanthanga chuan, bazarpui tur sak mek chu mipui mamawhna a nasat tawh avangin chak taka thawk tur leh, zan lamahte pawh thawk mai turin contractor-te a ngen.

Assembly Subject Committee-II Chairman-in ram leh mipui hmasawnna tur hna thawktu contractor hnenah zan lamah pawh hna thawk tel mai tura a ngen hi a àwm viau mai a, contractor lam tan erawh chuan thil harsa a ni mai thei.

Mizorama hmasawnna hnathawh lian zawng zawng deuhthaw hi zawh hun tura ruatah an zo lo tlangpui niin a lang a, eng emaw zat phei chu kum tam tak hun bawh pelh a nih bakah, ṭhenkhat phei chu pàmṭùl zui tâk ṭhakte pawh a awm niin a lang.

Hnathawh muang lutuk ṭhin hi sorkar leh mipuiin an tuar a, ram hmasawnna ṭhan a ṭhut phah a, a pawi ṭhin hle. Hnathawh muang ṭhinah hian contractor leh sorkar (nodal department) ten mawhphurhna an nei ve vein a rinawm.

Ram leh mipui hma ngaiin, mipui tawrhna awm ṭhinte hre rengin hnathawhte a hun taka zawh a nih theih nan contractor-te'n ṭan an lak a ṭul a; sorkar lama hotute pawhin ngawrh lehzuala an vil a, na zawka an nawr ṭhin a ṭul bawk.

Subject Committee-II Chairman-in, "Contractor-te'n estimate revise an beisei ṭhin a, sorkar sumin a tawrh phah a, ram hmasawnna a muan phah hle," a tih hi ngaihtuah zui a ngai. Contractor-te'n sum ruahman zat tihpun beiseia hna an thawk muang lui a nih chuan thil dik lo a ni a; chutianga tih chíngte chu chhinchhiah a, hna pek tawh loh chi a ni hial ang.