Kawngpui dan

Tun hnaiah Lunglei lama mi intelkhawm ṭhenkhatin sorkar thutluknaa an lungawi loh lantirna atan Lunglei pawhtu kawngpuite an dang a, lirthei eng emaw zat an dang.

Mizoramah hian tun hnaiah sorkar laka lungawi lo pawlte'n an lungawi loh lan chhuahtir dan chi hrang hrang an nei a, chung zinga an hman uar tak pakhat chu kawngpui dan a ni. Kawngpui an dan chuan mipui nawlpui che vel a tibuai a, sorkar mi pawimawhte veivak tur a tikhaihlak a, an thil nawrte pawh sorkarin an beng­khawn an beisei a ni.

Lungawi lote hian sorkar tihbuai hrim hrim emaw, mipui tihbuai hrim hrim lam hi an tum ber niin a lang ngai lo a, an tum ber chu an thil phût leh ngiatte sorkarin bengkhawn se, an lungawi lohnate sorkarin chingfel se an tih vang a ni. Pawl hrang hrang lungawi loh chhan a inang lo a, an hmanraw hman tlanglawn tak erawh chu kawngpui dan a ni.

Kawngpui dan hian nghawng a nei thui hle mai a, sorkar pisa kai tur a tikhaihlak a ni mai lo a, sumdawng lirthei veivak tibuaiin sum tam tak an hloh phah a, mi tam takin an hun pawimawh an nan loh phah a; kawngpui dan nghawng hi a lianin sum hloh phah pawh a ṭhahnem hle ang.

Eng pawl pawhin lungawi lohna an nei thiang a; nimahsela mipui nawlpui tana harsatna siam zawnga kawngpui dan leh total bandh-te hi chu pumpelh theih a ṭha khawp mai. Sorkar pawhin tute emaw intelkhawmin kawngpui an dan maite leh total bandh an huaihawt hluai maite hi chu a ṭul angin bei lêt ngam se, mipui nawlpui tawrhna leh harsatna thlentir hi chu pumpelh i tum tlang ang u.