Vawk zangnadawmna pek thuai ni se

Mizoram sorkarin vawk pùl hri, African Swine Fever vanga vawk thite state disaster (khuarel chhiatna)-ah a puang tawh a, chuvang chuan State Disaster Response Fund aṭangin chhawmdawlna pek a tum.

State sorkarin ASF vanga vawk thi neitute chhawmdawlna pek a tumah hian November 14 thleng khan chhungkua 4,980 aṭangin vawk 14,924 thi atan chhawmdawl dilna a lut tawh a, chu chu a pawisain Rs 5,96,96,000 a ni.

Sorkar laipui kalphungah ASF vanga vawk thi-ah zangnadawmna pek theih a ni lo a, vawk suatah chauh pek theih a ni. Hei vang hian kum hmasa lamah chuan ASF vanga vawk suattute hnenah zangnadawmna pek a nih laiin, vawk thi neitute'n dawn an nei ve lo a, an tuar tlawk tlawk mai a ni.

Mizoram sorkarin vawk hripui lêng vanga chhiatna tâwkte chhawmdawlna tur sum SDRF aṭanga a ruahman hi a ṭha hle mai; state sorkar hmalakna a fakawm. Vawk thi neitute tan a lawmawm tak zetin a rinawm a, vawk thi neitute tawrh nasatzia hre chiangtute pawhin an lawmpui ngeiin a rinawm.

Hri vanga vawk thi neituite'n sum tam tak an hloh a, chhungkaw tam tak chuan an retheih phah hial. State sorkarin zangnadawmna a pek turah an sum hloh ang zat a zavaiin hmu thei dawn lo mah se, eng emaw zat an hmuh theih dawn avangin an lawmpuiawm tak zet a ni.

Mizoram sorkarin SDRF sum aṭanga ASF vanga vawk thi-ah zangnadawmna a pe tur hian hri vanga vawk thi neitute tawrhte leh lungngaihna nasa takin a chhâwk zângkhai ngei ang.

ASF vanga vawk thi neitute hnena zangnadawmna pek tur hi sorkarin tikhawmuang rei lo se a, a rang thei ang bera tifelin, pe chhuak thei se a duhawm. Chutiang tur chuan mawhphurhna kengtute'n theihtawp chhuah rawh se.

Hetih lai hian, thil dik tâwk lo ti duh an lo awm palh thei a, ASF vanga vawk thi ni hauh si lo, ASF vanga vawk thi nei anga insawia zangnadawmna dawn tum an awm palh thei. Chutiang a awm loh nan chuan mawhphurtute an fimkhur hle a ngai ang.