Thlai chi sem
ZNP ṭhalaite chuan thuchhuah siamin, tun hnaia Hnahthial tlangdunga Horticulture department-in NLUP hnuaia lakhuihthei chî an sem chu a têt vang leh a ro hlawm avangin a dawngtute'n an chíng duh meuh lo niin an tarlang.
Mizoramah hian thlai chi supply thu-ah thil fel lo a awm fo tawh ṭhin a, mi ṭhenkhatin sum siamna remchang angah ngaiin kuthnathawktute hamṭhatna tur hi an lo tiriral tawh ṭhin. Tun hnaiah Agricultute minister-in thlai chi lei leh sem hi fel taka kalpui a nih tawh thu a sawi a, chumi hnuah ZNP ṭhalai lamin thil fel lo nia lang an hmu leh ta.
Lakhuihthei chi semah hian thil dik tawk lo a awm tak tak a nih chuan sorkar hian rang takin ke a pen nghal tur a ni. Heng thilte hi Mizoram sorkar suma lei, Mizo kuthnathawktute ta tur a nih si chuan tute'n emaw a chi ṭha lo an supply a nih chuan a mawhphurtu hian tuar rawh se. Mimal supply ni loa Horticulture department-in an lei a nih pawhin a leitu leh a khawihtute hian tuar mai se, hetiang thil hi hrem loha a chhuah chuan nakin zelah a ṭha lo ṭhin.
Mizoram sorkarin miretheite hmakhua ngai a inti a, miretheite hi VIP ang hialin thuneitu lamin an sawi ṭhin. Kuthnathawktute chan tur ngei thil dik lo, ṭha lo, tling lo leh a lem sem chhuah a awm a nih chuan thuneitu lamin endik se, a mawhphurtute hi hrem ni ṭhin rawh se.