Sorkar inrenchemna leh MR Bill

Finance minister Lalsawta chuan, sorkar hnathawkte medical reimbursement (MR) bill zirchiang tur committee din a nih thu a sawi a, sorkarin inrenchemna kalpui zel a tum thu a sawi.

Mizoram sorkar sum luan­ralna lian tak pa­khat chu medical reimbursement bill hi a ni a, hei hi thil ṭul tak ni si, thil heksak tak ni bawk si a ni. MR bill hi a nihna tur ang takin, dan anga kalpui ni ta se, tuna Mizoram sorkar sum sen tam tak hi chu hum theih a ni ngei ang.

MR bill chung­changah hian department-a a khawihtu bikte an pawimawh a, anni lam hian rinawm taka danin a phal china thil an tih chuan sorkar sum tam tak an hum thei ang. Anni aia la pawimawh zawk erawh chu doctor leh damdawi in hrang hranga hnathawktute hi an ni a, anni hian MR bill dan kalphung hi an hre chiang ber ang.

Danin bill theih a tih piah lama bill tum ṭalh te, a ṭhente chu a bill siamsaktute nena inthuruala bill siam nia puh theihte leh doctor ngei pawhin MR bill a nih theih hram dan ngaihtuahpuite pawh sawi tur an awm leh zauh ṭhin a, damdawi in chuam nei doctor-te pawh sawi rik an awm ṭhin.

Mizoram sorkar hian inrenchem a kalpui tak tak dawn a nih chuan medical reimbursement kal­pui dan hi chu a ennawn a ngai a ni. Sorkar aṭanga sum siamna remchanga hmang an awm ṭhin te, damlo zingah pawh medical reimbursement bill la thei lo chunga beisei tlat ṭhinte thleng hian an ennawn a ṭhat hmel.

Damlote tawrhna thlen si lo hian, medical reimbursement kalphung hi ennawna siam ṭhat theih a nih a rinawm a, fimkhur takin huaisen tak sia ke pen a ngai ang.