Hnamdang sumdawng

Mara Student Organisation (MSO) chuan tun hnai khan Saiha khawpui chhunga hnam dang dan loa sumdawng dawr 46 an khârsak. Heng mite hi Mizo hming hawha sumdawngte an ni a; dawr neitu tam tak chuan an bungrua an thiar chhuak tawh a, la thiar chhuak lote pawh thiar chhuak tura hriattir zel an tum.

Mizoramah tun hnaiah dan loa sum­dawng dap chhuah hna kalpui a ni a, hnam dang dan loa sumdawng eng emawzat hmuh an ni. Heng zinga mi tam zawk hi chu Mizo hminga sumdawng an ni a, Mizo ṭhen­khatin pawisa hlawhin an hming chu hnam dangte hnenah sumdawnna atan an hawhtir ṭhin a ni.

Sumdawn dan chi hrang tam tak a awm a, hnam dangte nena inzawma sumdawn hi thil tih ngai loh pawh a ni lo a; nimahsela Mizo ṭhenkhat sumdawn dan kalphung hi chu hnam dang nena inzawm pawh an ni chiah lo a, hnam dangin Mizo hming an hawh a, hming hawhtirtute chuan pawisa an dawng ve chauh zawk a, hei hi chu thil fel lo tak a ni.

Dan anga sumdawng an nih chuan eng hnam pawh ni se hnar tur an ni lo a, dan hnuaia an leng a nih phawt chuan Mizo an nih loh vanga hnawk tih tur an ni lo. Chutihlaiin dan loa sumdawng, hnam dang ni bawk si Mizorama an ngampa lutuk hi chu vei a hun a, kan state ṭhenawmte sumdawnna hmun­puia hnam dangin bu an khuar nghehzia en hian, dan loa hnam dang sumdawng ngaimawh hi chu thil tihâwm tak a ni.

Hnam dang sumdawng kan dap dawn a nih chuan dan anga kan kalpui a ngai thung a, dan loa sumdawngte dap chhuak tura dan lo bawka thil kalpui hi a fel lo. Chuvangin, dan loa sumdawngte dap chhuak tur hian dan angin thil kalpui se, dan loa awm na na na hi chu dan hmanga an sumdawnna tihtawp a ṭha ber ang.