Private security

Tun hnaiah Mizoram khawpui ber Aizawlah misual tute emaw mi ina lut man an awm ta zauh zauh a; misual ṭhenkhatte hi chu tun hmaa rukru ṭi tak ang kha an ni tawh lo a, in neitute rikrapa pawisa leh thil hlu chhuh tum ngamte an awm ta hial a ni.

Ram dang leh state dangahte chuan Mizoram ang em em hian in hi a inhnai vak lo a, in leh in in­karah fel taka inhung­in a luhna gate ṭha deuhte an siam a, mahni ram chin fel taka chhinchhiah a ni tlangpui. Aizawl leh Mizoram khawpui ṭhenkhatah hi chuan in leh in a insi deuh ṭhup a, mahni compound chin pawh hauh hleihtheih lohin kan inṭawm pût a, in hungna fel tak nei hi a tlem zawk an ni awm e.

Suahsualna a puang zel a, mi ina luta a neitute rikrap duh hialte an lo awm takah hian mahni sahimna zawn hi thil ṭul tak a ni ṭan ta. Tun hma deuh chuan khawtlang duty-te siamin anni an awm hi chuan misual pawh an ṭi deuh ṭhin a, tunlaiah chuan zan rehah chauh ni loin chhun êngah pawh misual an che ta fo mai.

State dangahte an tih ṭhin angin a nei nung deuhte hi chuan private security-te pawh neih a hun tawh mai thei a, mi ṭhenkhat chuan an nei tawh reng a ni. Mi zawng zawng neih theih ni lo mah se, a nei theiṭe'n private security hlawh neia an rawih chuan an in an ven bakah a chehvela inte thlengin a him phah thei a; Mizo ṭhalaite tana ei­zawnna insiamsak­na kawng khat a ni tel bawk.

A nei zo chin chuan mahni in leh a chhehvel him ṭha zawka hung hi intihhmuh thar ila, kan khawvel awm danah hian private security rawihte pawh kalpui a ngai ṭan dawn niin a lang a, tihdam aiin inven a ṭha zawk tih hi i zir thar ang u.