Halpuah khap leh Mizoram luhka ven ṭhat

Krismas leh kum thar hunpui lo thleng tur avangin Mizoram sorkarin hâlpuah, hâlmawi leh a kaihhnawih thilte a khap a; khapna a hlawhtlin theih nan sorkar, police, pawl leh mi hrang hrangin ṭan an la mek.

Hâlpuah leh a kaihhnawih thilte khapna a hlawhtlin theih nan police-te'n ṭan an la a, Aizawlah chuan sorkarin a khap thilte zuar an awm leh awm loh dawr hrang hrangah an enfiah chho mek. Sorkarin khapna thupek a chhuah tawh a, a hlawhtlin theih nan mawhphurtute'n theihtawp an chhuah hi an tih tur tak a ni a, ṭan an lak zui sauh sauh zel a ṭul àwm e.

Hâlpuah hâl ṭhinte zingah Krismas leh kumthar dawn hnaiah ni lo, a hma deuh aṭanga an inla khawm eng emaw zat an awm a rinawm. Chuvang chuan hâlpuah lak luh a nih loh nan leh, lak luh tawhte pawh man chhuah a nih theih nan tun aṭanga hmalak a ngai rêng a ni.

Aizawl leh khawpui dangahte hâlpuah kawl an awm leh awm loh dap a ni hi a ṭha a, courier service-te'n bungrua an dah khawmna hmun an dap tel pawh a ṭha tak zet. Vawi khat dap ringawt a tâwk dawn lo a, a khát tâwka dap reng a ṭul ang.

Hlawhtling taka hâlpuah, hâlmawi, adt. khap tur chuan Mizoram luhkáte vên uluk a ngai. Mizorama hâlpuah lut tur dang chat tur chuan Mizoram chhunga dawrte dap chiam ai mahin, state páwn aṭanga Mizoram luhkáte vên ulukin awmzia a nei zawkin a rinawm.

Mizoramin luhka hrang hrangah Police leh Excise department mai bakah, department dang ṭhenkhatin checkgate neiin duty an indah a, Mizorama lut tur thilte an endik ṭhin. Checkgate-ahte hian state dang aṭanga Mizorama lutte'n hâlpuah leh a kaihhnawih thilte an ken leh ken loh uluk lehzuala endik a ṭul ang.

Lengpui Airport kaltlangin tlawhtheihna hmangin ni tin mi ṭhahnem tak Mizoramah an lut a, chu'ng mite bungrua chu endik a ni ngai lo. Hei vang hian tlawhtheihna hmanga rawn hawte'n hâlpuah leh a kaihhnawih thil dangte an keng lut thei reng a ni. Hâlpuah khap hlawhtling tur chuan Lengpui Airport-ah hian khualzin lut/hawte bungrua enfiah a ṭul ang.