Horticulture leh Mizoram

Horticulture department chuan tunlai hian Horticulture Fair 2015 an buatsaih a, a hawngtu chief minister Lal Thanhawla chuan Mizoramah organic farming chak zawka kalpui ṭul a tih thu a sawi.

Horticulture department hian kum 2012 aṭangin Horticulture Fair hi an buatsaih ṭan tawh a, kum 2012-ah dawr 57 siamin, cheng nuai 17 chuang an hmu a, kum 2013-ah nuai 22.9 leh kum 2014-ah nuai 12.4 vel an hmu a ni. Hengte hmanga Horticulture Fair changtlung tak an buatsaih thei hi a lawmawm a, chutihlaiin horticulture hi a hmuna luhchilha mithiam zawkin an zir chian zel a ṭha khawp mai.

Horticulture hi Mizoramin kan ṭhatpui tur leh kan hma­sawnna atana ṭangkai tur a nih thu hi sawi ṭhin a ni a, mi tam tak chuan an hlawkpuiin an dinchhuah phah tawh reng a ni. Hetihlai hian Mizo mipui nawlpui hian Mizorama thil ṭha duh an sawite aṭanga sum an lakluh hi a la beitham hle mai a, tute emaw hlawkna leh dinchhuahna tur mai ni lo, mipui nawlpui ban phaka thil kalpui thiam ni se a ṭha hle.

Mizoramah hian kuthnathawktute hamṭhatna turin thu­neitu lamin kawng tam takin hna an thawk a, an hnathawhte hi a hlawkpui tawk an awm laiin tam tak hi chuan mipui nawlpui a thleng phak lo emaw tih mai tur a ni. Horticulture lamah pawh hian department hran meuha a dinna pawh a rei tawh a, tun ai hian mipui nawlpui thleng phak tura an inzar pharh a, an thlen chin an zauh zel a ṭul takzet a ni.