IAF hnena Airport hlan a ṭha nge ṭha lo

Mizoram sorkar chuan November 20, 2024-ah Working Committee to Look into the Maintenance and Management of Lengpui Airport a din thar leh a, chairman chu Adviser to CM (Finance & Planning) a ni.

Lengpui Airport mi dang enkawltir chungchang ngaihtuah turin Mizoram sorkar chuan Working Committee a lo din tawh a, an report sorkarah an thehlut tawh a, report chu Council of Ministers pawhin October 16, 2024 a thuphungin a pawm. Committee hian Lengpui Airport mi dang enkawltir dawn pawhin, Indian Air Force (IAF) lo chu remchang an hmu lo nia sawi a ni.

Sorkar thuchhuaha a lan danin, sorkarin Working Committee a din thar leh a. Committee Terms of Reference-ah chuan, IAF hnena Lengpui Airport hlan dan tur chungchang zir chiang tura tih an ni a; IAF nen indawr a, draft memorandum of agreement thlenga ruahmanna mumal tak siam tura tih an nih bakah, thla thum chhungin report sorkarah thehlut tura tih an ni. Terms of Reference enin, Mizoram sorkarin Lengpui Airport hi IAF hnena hlan a pawiti lo niin a lang.

Lengpui Airport mi dang enkawltir hi sorkar kal tawhte pawhin an lo tum tawh ṭhin a, mahse, a la hlawhtling lo. Eptu political party apiangin sorkar lai beih nan an hmang ṭhin. Tunah pawh hian eptu party-te chuan sorkar beih nan an hmang leh ngeiin a rinawm.

Politics-a hamṭhatna lak tuma inbeihna atana an hman thilte hi ram tana thil ṭha ber a ni vek lo a, eptute'n beih nana an hman avangin thil hi a ṭhain a ṭha lo lem lo. A pawimawh ber chu sorkar, ram leh mipui tana ṭha tur a ni.

IAF hian Lengpui Airport enkawl ta se, Airport hmang ṭangkaitu ber Mizoram mipuiin harsatna an tawh phah dawn em, tih hi a pawimawh ber a ni a; fimkhur tak leh uluk taka zir chian a ṭul.

Mipuiin harsatna an tawh phah dawn loh chuan huaisen takin IAF chu enkawltir ni se, eptu party-te sawiselna chu menah thlâk a ṭul ang. Mipuiin harsatna chhetê pawh an tawh phah dawn a nih erawh chuan hlan loh mai a ṭhain a rinawm.

IAF hnena Airport hlan leh hlan lohah hian Mizoram hun kal zel tur thlir telin, kan la inchhîr lohna turin thutlukna siam a ngai e.