Central min hmuh dan

Task Force on Poverty Alleviation ṭhukhawm chuan, retheihna ûmbo hna thawh dan tura Central-in state hrang hrangte tehfung pakhat hmanga a teh ṭhin chu a fel tawk lo hlea an ngaih thu an tarlang. 'NITI Aayog hian Central aṭanga rem leh rem loa tih tur intuk ngawt loin state mil­in programme leh scheme-te duang se, state mamawh leh state tana ṭangkai tur scheme-te rilru zau tak púa duang turin NITI Aayog-ah thlen ni se,' an ti.

Central sorkar hian India ram pum huapa thil tih tur a duan hian an ngaihtuahna an sen zau a ngai hle mai a, ram zau tak, hmunhma leh boruak inang lo tak taka chengte mamawh hi a inang vek lo a, hnathawh theih dan leh ṭul dan pawh a inang lo tih hi an hriat chian a ṭha hle.

Central sorkar-a policy duangtute hi chu India ram hre chiang ber tura ngaih, India ram kil tina mite'n rualkhai taka ke an pen theihna tura kalphung duang thiamtu bera ngaih an ni. Hetihlaia anni berin India ram state hrang hrangte ang khata ena thil ṭul leh hnathawh dan ang khat an bituk ṭhin hi chu a fel lo a, state azirin tehfung hrang hrang siam se a ṭhat zawk a rinawm.

Thil ṭhenkhatah hi chuan sorkar laipui lam hian hmar chhak state ṭhenkhatte tana harsatna siam an tum ta emaw tih mai tura an chet chang a awm a, India ram hmun kilkhawr zawka chengte tana harsa tur thil hi an kalpui chang a awm leh zauh ṭhin.

Hetihlai hian Mizoram sorkar leh mipuite hian central sorkar min hmuh dan leh min enkawl dan ringawt hi vei leh helh berah nei lo ila, engtin nge mahni kea kan din ve theih ang, tih lam ngaihtuahin ṭan la ila, central sorkar lam chuan eng ang pawhin min lo en mah se inrintawkna nen ke kan pen ve thei zawk ang.