Bru vanga buaina

Mizoram political party leh tlawmngai pawl aiawh kal khawmte chuan Tripura transit camp-a awm mek Bru-te chu Mizorama kir tura an duh thu an puang.

Tripura-a awm mek Bru-te hi June thlaa lak kir tura ruahmanna kal mek avangin sor­kar official-te chuan tunlai hian rua­hmanna hrang hrang an siam mek a, Bru-te hmakhua hi central sorkar lamin an ngaihven hle. Mizoram aṭanga tlan chhuak Bru-te lak kir tur hi hun rei tak chhung ngaihtuah a ni tawh a, vawi tam tak a hlawhtling lo a, June-ah hian hlawhtling tawh ngei se a ṭha hle.

Bru-te chanchin sawi dawn hian Mizoramah chuan ngaihdan fel tak a awm tawh a, chu chu Mizoram aṭanga chhuak ngeite lo chu lo lut lo se, tih a ni. Tripura-a awm Bru zingah hian Mizoram aṭanga chhuak an awmlaiin Mizoram aṭanga he hmuna lut ni lo, hmun dang aṭanga transit camp-a lut hi an awm ve bawk a, he mi thliar fel hi thil hautak tak pawh a ni thei.

Sorkar laipuiin an kalpui duh dan chu eng zawng pawh lo ni se, Mizorama Mizo mipuite hian ngaihdan an siam fel tawh a, Mizorama mi ni sa ni lo chu Bru-te Mizorama an lo luh hi an phal lo. Bru awm khawmna Tripura pan a, an zinga an khawsak tak avanga Mizorama an lo kir ve ngawt a nih chuan thil fel lo tak a ni ang.

Mizorama poli­tical party leh tlawm­ngai pawlte hian rilru zau takin Bru kal chhuakte hi an lo kir an rem ti a, anni berin an pawm tawh chuan harsatna nei loin ṭha takin an lo kir thei dawn niin a lang. Sorkar laipuiin ruahmanna an siam a, state sorkarin a buai­pui a, Mizoram political party leh tlawmngai pawl berin an pawmpui tawh a, chuti chunga an lo kir duh lo a nih chuan a buaithlak tawh dawn hle a ni.