Thil dik lo hre thei ram hruaitu

Chief minister Lal Thanhawla chuan, "Sorkar ṭha leh dik, nêlawm leh langtlang, lepsê ngam siam kan duh," tih a sawi a; MLA fund-te chu DC office-in a khawih ṭhin tih sawiin, "A lo buaipuitu leh khawihtu ṭhenkhatin anmahni tan an lo pawtpéng ve ṭhin tih hriat a ni a, hei hi an tih miah loh tur, sim vat chi a ni," a ti bawk.

Right to Informa­tion Act, 2005 zir­honaa chief minister thusawi hian ngaih­tuah a tithui a, sorkar langtlang leh lepsê ngam siam a tum thu a sawi chhuak hi a fakawm. Chief mi­nister-in DC office-a mi ṭhenkhatte thil tih dan a sawi chhuak ngamte pawh hi a fakawm a, langtlang taka thil sawi chhuah zel a duh niin a lang.

Hetihlai hian kan ram hruaitu berin DC office-a MLA fund pe chhuak ṭhinte zingah thil fel lo a awm tih a hriat chuan, a tisualtu hi dan angin hrem mai se a ṭha khawp mai. Amah hi a hrem theitu a ni lo a nih pawhin, a sorkar officer tute emaw hnenah thu pe se, dan dik loa MLA fund sem paha pawisa lo pawt pêngtu a hriat chu hrem ngei ni se, chu chuan ama sawi angin sorkar 'dik' an nihzia pawh a nemnghet thei awm e.

Mizoramah hian thil dik lo hre thei tak tak hi an tam a, a dik lo siam ṭha ngam erawh an tam lo. Ram hruaitu lu berin vantlang hriata dik lo awm ngei a sawi chhuah hi amahin a bawhzui lo a nih pawhin tu emaw chuan bawhzui ngei se, thil dik lo hre thei ram hruaitu hi a dik lo siam ṭhatuah ṭang nghal thei phei se ramin a ṭhatpui ngawt ang.