Zo hnahthlakte inpumkhatna

Chief Minister chuan tun hnaia Lawngtlaia International Chin Christian Youth Conference inkhawmpui a hmanpuinaah, Zo hnahthlakte inkara inhmuh thiam lohna awm ṭhin chu pawi a tih thu leh Zo hnamte inpumkhat a hun tawh thu a sawi.

CM hian Zo hnahthlakte chu hnam dangin Lushai, Chin leh Kuki tia an sawi ṭhin thu a sawi a, "Rei tak chhung tlang dang danga awm hrang nih tawh avanga mi hrang leh hnam dang anga inenna awm ṭhin hi sim a hun tawh a, inpumkhat leh tura theihtawp chhuah a ṭul," a ti a ni.

Zo hnahthlakte hi Zo hnam ang chuan kan tlêm lo niin a hriat a, kan chhehvel state-a hnam ṭhenkhat, tuna keini aia tam nia kan ngaihte ai chuan Zo hnahthlak hnamte hi kan tamin a rinawm.

Zo hnahthlakte hi hnam khat kan ni, chhûl khat chhuak kan ni, kan intih reng lai hian Zo hnam ṭhenkhat inkarah innghirnghona a awm tawh ṭhin a, a la awm mek zel bawk a; tharum thawha inbeihna hial a lo awm tawh ṭhin. A zialo tak zet a ni.

Chief Minister-in a sawi angin, Zo hnahthlak hnam pêng hrang hrangte hi inen hrang tawh lo a, impumkhat tura ṭan kan lak zawk a ṭul. Zo hnam hi hnam tlêmtê kan ni lo, mahse, kan inpumkhat loh avangin hnam lian leh chak tak angin kan lang thei lo a ni. Hnam chak leh ropui, huhâng ngah ni tur chuan kan inlungruala kan inpumkhat a ngai.

Tuna Mizoram ṭhenawm state leh rama buaina thleng hi a pawi em em a, Zo hnam chhungkuaa mi eng emaw zat dinhmun harsa takah an awm phah mek a, an khawngaihthlak tak zet. He harsatna hi Zo hnahthlak pêng hrang hrangte inlungrualna leh inpumkhatna atan hman ṭangkai tum ṭheuh ila a duhawm.

Zo hnahthlak pêng hrang hrangte inrem taka inpumkhat tur hian eng hnam pênga mi pawhin inlak bing duhna, ṭha bik leh lian bika inngaihna, chanvo ṭha chang tura inngaihnate kan paih a ngai. Inrem duhna thinlung, mi dang rem duhna rilru kan neih a ngai a; chutiang tur chuan hnam pêng hrang hranga hruaitute'n hma an hruai a, bul an ṭan a ngai a ni.