HIV/AIDS donaah ṭan tlan a ngai

December 1 khan khawvel pum huapa HIV/AIDS dona ni, World AIDS Day a ni. He ni pual hian Mizoram Presbyterian Kohhran chuan thuchah siamin, chu chu tualchhung kohhran tinah chhiar chhuah a ni.

National AIDS Control Organisation-in HIV Estimate kum 2023-a a tihchhuahah, Mizoram mipui zinga 2.73% chu HIV vei an ni a, India ramah state mipui zat aṭanga chhûtin HIV vei tamna ber a ni. Mizoram hi Nagaland (1.37%) leh Manipur (0.87%)-te'n an dawt.

Kristian ram ni si, HIV vei tamna ber kan ni hi a zialo tak zet a, a mualphothlak tel bawk. March 2024 thlenga Mizorama HIV kai hmuh tawh mi 30,523 zinga 65% vel chu mipat hmeichhiatna aṭanga kai an ni a; 91.23% chu ṭhalai, kum 15-49 inkar an ni bawk.

HIV kaite zinga 65% vel lai mipat hmeichhiatna aṭanga kai an ni a, mipat hmeichhiatna tih hian, a tam berah chuan mipat hmeichhiatna hman khawloh hi a bul chu niin a lang. Nupa kar ni loa mipat hmeichhiatna hman hi Pathian duh loh a ni a, Pathian duh loh zawng tak tih avanga HIV vei tamna ber kan ni hi a mualphotlak lai a ni.

Hun rei tak Mizoramah HIV/AIDS do a ni tawh a, chuti chunga India rama a hluarna ber state kan la ni reng mai hi a manganthlak hle. Kan do danah hian fuh tawk lo a awm a ni thei ang em? Kan lo tih tawh ṭhin dan thlauhthla si loin tih dan thar, awmze nei zawk tur a awm mai thei. Chîk tak leh uluk taka ngaihtuah a ngai.

Mipui nâwlpuiin kan rama HIV/AIDS hluar lutuk hi kan vei a ngai. Sorkar hotu te, sorkara mawhphurtu bik te, kohhrante leh pawl hrang hrangte mai bakah, mi tinin kan ngaimawh a ngai a; do hneh turin thawhho thiam a ṭul bawk.

Huhâng nei lian kohhrante'n ngaimawha hma an la tak tak ta hi a lawmawm. Kohhran lian ber Presbyterian Kohhran-in World AIDS Day puala kohhran tina chhiar chhuah tur thuchhuah an neite hi a lawmawm a, ṭan la chhunzawm zel se, awmzia a nei ngei ang.

HIV/AIDS do hneh turin sorkar, kohhran, pawl leh mipui kan ṭan tlan a, kan tih theih tâwk ṭheuh kan tih a ngai a, chutiang tur chuan ngaihtuahna kan nei a ṭul. Kohhran leh pawl anga hmalakna remchang loahte pawh a ti mite leh thiam bikte thawhpui thiam a ngai e.