Gas buaina hi

Mizoram Consumers Union (MCU) chuan thuchhuah siamin, Mizorama gas (LPG) distributor tam zawkin sorkar thuchhuak leh company kaihhruaina an zâwm ṭha duh lo niin an tarlang a, "Consumer-te'n an tuar mek a ni," an ti.

Tun hnaiah sorkar laipui ruahmanna thar angin Direct Benefit Transfer for LPG (DBTL) tihlawhtling turin Mizoram sor­karin hma a la mek a, DBTL hi tluang taka kalpui a nih chuan mipui lam tan chuan thil tih vel a awlsamin gas tihchingpen venna ṭha tak pawh a ni thei. Chutih laia MCU-in thuchhuah an siam ngai hial khawpa distributor lamin kaihhruaina an zawm duh lo a nih chuan, thil pawi tak, mipui zah lohna ang hiala ngaih theih a ni ang.

Mizo mipuite eirawngbawlna gas avanga an buai hun chhung hi a rei tawh a, kum tam tak chhung mumal lo takin a kal tawh. Tun hnaiah DBTL hmangin buaina chinfel theih ni dawnin a lang a; nimahsela buaina chinfel lam aiin tuna an thlen chinah hi chuan mipui chinchang hre lo zawkte tana buaina belhchhahtu a ni mai ang tih a hlauhawm hle.

Gas distributor-te hian an duh a nih chuan mipui tana awlsam tur zawk, mipui zangkhaina tur hian ruahmnana an siam thei ngei ang tih a rinawm, an hnuaia inziak lutte tana awlsamna lam hi tun ai hian ngaihtuah zual se a ṭha khawp mai. LPG distributor, sorkar leh MCU-te hi ṭha takin ṭangho se, hun rei tak chhung eirawngbawlna gas sem dan mumal lo avanga buai tawh Mizo mipuite gas avanga buai­na hi sut kian tum se, harsatna siam zawngin tu mah awm lo se a ṭha hle a ni.