Thluak leh lung Mizorama zai theihna turin sorkarin chak zawkin hma la se

Mizoram Governor-in Health & Family Welfare department hotute an Minister hoa December 2, 2024-a a kawmnaah Zoram Medical College-a Neurosurgery department din theih dan tur a sawipui.

Inkawmnaah hian Health Minister-in ZMC-ah Neurosurgery department awm theih nan leh Cardiothoraco Vascular Surgery operation theatre a awm theih nan hma an lak mek thu a sawi. Heng thil pawimawh, Mizoram mamawh tak takte hi din a nih theih nan corporate social responsibility (CSR) sum hai luh thiam a ṭul thu Governor-in a sawi ve bawk.

Health Minister-in ZMC-ah Neurosurgery leh Cardiothoraco Vascular Surgery tih theih a nihna tura hma an lak mek thu a sawi hi a lawmawm a, tipuitling ngei turin theihtawp chhuah zui se.

Thluak lam leh lung (heart) lam zai ngai Mizo zingah an tam tial tial niin a lang a, tunah chuan Mizoramah tih theih a nih bawk si loh avangin phai lam pan zel a ngai. Phai pan turin sum leh pai a hautak em em a, mi tam takin an tlin lo.

Mizo doctor-te zingah thiamna sang zawk nei an awm belh ve zel a, mahse, hmanrua neih loh avangin Mizoramah ngei thawh duh mah se, an thiamna ang takin an thawk thei meuh lo. Lung zai thei mithiam bikte pawh Mizo zingah awm tawh mah se, an thiamna tak tak phawk chhuak turin hmanrua a la awm si lo a ni.

Mizo doctor thiam tak takte'n an thiamna ang taka Mizorama hna an thawh theih nan Mizoram sorkarin hma a lak a ngai a, Mizoramah ngei Neurosurgery leh Cardiothoraco Vascular Surgery tih theih a nih theihna turin chak taka hmalak a ngai a ni.

Doctor thiam tak takte'n an thiamna ang taka hna an thawhna tur Mizoramah a awm loh chuan state páwn lama thawk tura an kal leh mai pawh thil awm thei tak a ni. Kan doctor-te thiamna hi Mizoram leh Mizo mipui, khawsak harsa zawkte ban phâkah a awm a, an chhawr ngei theih nan sorkar hian theihtawp chhuah ngei rawh se.