Hmeichhe infiammite inzirna tur

Mizoram State Women Commission chairperson Van­lalawmpuii Chawngthu chuan, hmeichhe infiammi ni turin intih pa kher a ngai lo a, hmeichhe pangngai ni chungin infiammi ṭha tak a nih theih chu a sawi a; he thu hi National Sub-Junior Football Championship 2015-a tun hnaia champion Mizoram team-te a fuihnaah a sawi.

Mizo hmeichhe zingah infiammi chhuanawm tak tak an chhuak zel a, Mizoram state leh India ram hial tihmingṭhatute pawh kan nei ṭan ta. Hetihlai hian Mizo hmeichhe infiam­mite zingah mahni pianphung nihna kalpêl a, hmeichhia ni si mipa nunphunga nun tum tlat an pung zel hi thil ngaimawhawm tak a ni reng a, Women Commission chairperson-in a sawi chhuak pawh hi a inhmeh hle a ni.

Pathianin mihring hi pian­zia neiin a siam a, mipa leh hmeichhiaah a siam a, chumi duhtawk lo niawm taka hmeichhia si mipa khawsaka khawsak tum tlat Mizo zingah tun hnaiah an pung. Infiamna huangah chauh lo pawh hmei­chhia ni chunga mipa nuna nun tum tlat hi an pung zel a, hmeichhe infiammi zingah hetiang mi hi hmuh tur an tam a, a zialo hle a ni.

Pianphung aṭanga danglam deuh a, mipa zingah pawh hmeichhe nih châk tlat, hmeichhia ni si mipa an châk tlat hi awm ve reng a ni a; nimahsela a nawlpui hi chuan inkhap, inzirtir leh ṭha taka inenkawla inven theih chin a awm ngei tur a ni. Zêp thu a chêng lo a, sports lama inhman hmaa hmeichhe fel tak, sports a luhchilh hnua pâ ta thung mai hi an awm ṭhin a, hei hi kan hmeichhiate hian an sim a, an nihna anga an lan chhuah zel hi a pawimawh hle a ni.

Mizoramin sports lamah hma a sawn a, tun aia nasa zawkin a luhchilh chho zel dawn niin a lang. Mizo hmeichhia infiammite'n hmeichhia tak chungin sports hi a kalpui theih a ni tih a takin lantir zel se, hmei­chhe infiammi ṭha tak ni tur hian hmeichhe awm dan dik taka awm chungin a hlawhtlin theih tih hi infuihna atan hmang chhunzawm se a ṭha khawp mai.